Бауыржан Сағындық: «Бізде топтан шығуға жақсы мүмкіндік бар»

– Ең алдымен баршаңызды жеңіспен құттықтаймын. Командаға, сондай-ақ бапкерлер құрамына, әкімшілік және медициналық штабтарға атқарған жұмыстары үшін алғыс айтқым келеді. Біз Алматыда өте жақсы дайындық өткіздік, қарсыластардың ойынын мұқият талдап, негізгі ойыншылардың күшті және әлсіз жақтарын зерттедік. Бұл ойын жоспары мен стратегиямызды жүзеге асыруда өз нәтижесін берді.

Іріктеу ойындары әрдайым жақсы жағдайда өтеді, бәрі жоғары деңгейде ұйымдастырылған. Бұл матчтардағы мақсатымыз – әрқашан ең жоғарысы. Біз бастан-ақ үлкен мақсат қойдық, себебі менің мінезім сондай: егер бірінші орын немесе топтан шығу үшін күреспесең, онда не үшін келдің?

Біздің стратегиямыз – сенімді қорғаныс пен шыдамдылыққа, қарсы шабуылға негізделген. Бір ойыншыны ерекше атап өткім келмейді, себебі бүкіл команда үлкен жұмыс атқарып жатыр. Бірақ бұл тек алғашқы қадам – әлі де көп еңбектену қажет.

Хорватиямен ойын өте көп күш алды. Енді басты міндет – команданы қалпына келтіру. Тек физикалық емес, менталдық тұрғыда да. Қазір әлеуметтік желілерде балаларды көп атап жатыр, сондықтан олардың назарын бөлуге жол бермеу маңызды. Қазір бастысы – тек бір жеңіске тоқталмай, алға қойылған міндеттерге шоғырлану. Мұндай жетістік он-жиырма жылда бір рет емес, тұрақты түрде болуы керек.

Бізде топтан шығуға жақсы мүмкіндік бар. Сондықтан әр ойында соңына дейін күресіп, келесі кезеңге өтуге тырысамыз.