Қайту

QJ League Awards 2026: «Үздік бапкер» номинациясының шорт-листі

Main image

Freedom QJ League маусымының үздік бапкеріне табысталатын Георгий Хутиди атындағы сыйлыққа үміткерлердің шорт-листі жарияланды.

Рафаэль Хамидуллов, «Шахтер» U-17

Рафаэль Хамидуллов жаттықтыратын команда U-17 турнирінде чемпиондық атақ үшін «Қайратпен» соңғы турға дейін таласып, қарсыласынан небәрі бір ұпайға қалып қойды.

«Кеншілер» 56 ұпай жинап, күміс жүлдегер атанды: 18 жеңіс, 2 тең ойын және 2 жеңіліс. «Шахтер» маусымды қатарынан тоғыз жеңіспен бастады – бұл турнирдегі ең ұзақ жеңісті серия. Сондай-ақ қарағандылықтар 22 матчтың бәрінде гол соққан жалғыз команда атанды. Бір жыл бұрын осы буын U-16 турнирінде небәрі 27 ұпай жинап, алтыншы орын алған еді.

Ерік Ермағамбетов, «Ақтөбе» U-16

Ерік Ермағамбетов жаттықтыратын команда U-16 турнирінің қола жүлдегері атанды: 43 ұпай, 13 жеңіс, 4 тең ойын және 5 жеңіліс. Қорғаныс көрсеткіші бойынша «Ақтөбе» турнирде екінші орын алды: команда 21 гол жіберіп, 10 матчта қақпасын құрғақ сақтады. Тек «Қайрат» қана одан аз гол жіберді.

«Қызыл-ақтар» екінші айналымды әсіресе сәтті өткізді: мүмкін болған 33 ұпайдың 26-сын жинады. Бұл көрсеткіш бойынша олардан тек чемпион ғана озып түсті. Соңғы турда «Ақтөбе» «Қайсарды» 6:0 есебімен ойсырата жеңіп, қола жүлдені қамтамасыз етті.

Игорь Бугаев, «Тобыл» U-15

Игорь Бугаев жаттықтыратын команда тарихта алғаш рет өткізілген U-15 турнирінің күміс жүлдегері атанды. Бұл жетістікке шабуылдағы нәтижелі ойынның арқасында қол жеткізді: «Тобыл» 74 гол соғып, «Қайраттан» кейінгі екінші көрсеткішке ие болды.

Қостанайлықтар маусым бойы үздік екіліктен түскен жоқ. Бірінші турдан кейін турнир кестесінде көш бастаса, екінші турдан бастап маусым соңына дейін екінші орында тұрды.

Сыйлық иесінің есімі 7 қарашада Алматыда өтетін QJ League Awards салтанатты рәсімінде жарияланады. Трансляция Freedom Кино мен ТВ сервисінде қолжетімді болады.

Георгий Хутиди атындағы сыйлықтың жылдар бойынша иегерлері:
2023 жыл – Максим Габунов («Ақтөбе»);
2024 жыл – Русланжан Райымбакиев («Қайрат»);
2025 жыл – Игорь Солошенко («Шахтер» U-17).