Freedom QJ League президенті Рохус Шох жұмыс сапарымен Алматы қаласына келіп, «Жас Қыран» стадионында болды.
Рохус Рохусұлы балалар мен жасөспірімдер футбол орталығының жаңартылған инфрақұрылымымен танысты. Биыл стадионда ауқымды жұмыстар жүргізілуде: көгал толықтай ауыстырылып, заманауи суару жүйесі орнатылуда. Сондай-ақ Лига президенті «Жас Қыранның» құрылтайшысы әрі жетекшісі, кәсіпкер Берік Қаниевпен кездесті.
«Жас Қыран» Лига құрылған сәттен бастап оның қатысушысы болып келеді. Алматы клубы флагмандық турнирдің алғашқы маусымында күміс жүлдеге ие болған. Биыл да орталық тәрбиеленушілері жүлделі орындарға таласуға ниетті – 6-турдан кейін U-18 командасы турнир кестесінің үшінші сатысында тұр.
«Футбол менің өмірімде әрдайым болды. Бала күнімізде «Қайраттың» матчтарына жүгіріп баратынбыз, өзімді сол аңыз ойыншылардың жанында алаңда жүргендей елестететінмін. Сол құштарлықтың бір бөлшегін осы балаларға жеткізгім келеді.
Тимур Турловқа және менің жақын досым Рохус Шохқа алғыс айтқым келеді. Егер QJ League болмағанда, мұндай эмоциялар да, осыншама дарынды балалардың жарқырауына мүмкіндік те болмас еді. Бұл – ақшамен де, жұмсалған еңбек сағаттарымен де өлшенбейтін үлкен үлес. Лига туралы толқып, көздеріне жас алып айтатын адамдар аз емес.
QJ League бізден үнемі жоғары стандарттарға сай болуды талап етеді. Соның арқасында біз де дамып келеміз: қызметкерлер саны артып, жұмыс сапасы жақсарып жатыр.
Командаларымыздың спорттық нәтижелері бұрыннан жақсы болғанымен, QJ League-пен ынтымақтастық жаңа мүмкіндіктер мен даму бағыттарын ашты.
Лиганың спорттық-сараптамалық бөлімнің үйлестірушілері біздің бапкерлермен тұрақты жұмыс жүргізеді: матчтарды талдайды, ұсыныстар береді, тәжірибе алмасады. Балалар футболын дамыту – ортақ міндет. Бір-бірімізді толықтырып отырсақ, бұдан барлығы ұтады деп есептеймін», – деді Берік Сералыұлы.
«2023 жылы жобаны бастаған кезде-ақ біз нақты талаптар мен стандарттарды белгіледік. Сол кезде-ақ өз базасы, стадионы, жоғары деңгейдегі бапкерлері мен тәрбиеленушілері бар, жүйелі жұмыс істеп отырған «Жас Қыранды» назардан тыс қалдыру мүмкін емес еді.
Біз Лигаға тек өңірлердің өкілдері ғана қатыспайтынын бірден айттық. Егер барлық талаптарға сай келетін мықты жекеменшік мектеп болса, ол да қатысуы тиіс.
Бұл шешімнің дұрыс болғанына көз жеткіздік. Ең бастысы – мектеп инвесторлары мен басшылығының өз ісіне деген шынайы сүйіспеншілігін көрдік.
Бүгінде жекеменшік клубтар туралы көп айтылып жүр. Мемлекет басшысының бастамасының арқасында кәсіби футболға жеке инвестициялар келе бастады. Ал Берік Қаниев бұл іспен көптен бері айналысып келеді әрі оны артық даңғазасыз атқарып жүр. Ол инфрақұрылымды дамытып, балалар футболына ерекше көңіл бөледі.
«Жас Қыран» ұзақ жылдан бері жүйелі жұмыс істеп келеді. Оның түлектерінің қаншасы Премьер-лигада ойнап жүргенін, Қазақстанның жасөспірімдер және жастар құрамаларында өнер көрсететінін қарасақ, бұл орталықтың ел футболына қосып отырған үлесі айқын көрінеді.
Берік Қаниевке алғыс айтқым келеді. Оның бүгін атқарып жатқан жұмысы – көпшілікке үлгі. Ол тек алаңды жаңартумен шектелмей, базаны толық қайта жаңғыртып, оны кеңейтуді, мұнда толыққанды академия құруды жоспарлап отыр. Стадион мен ішкі нысандарға жөндеу жүргізілуде.
Мұның барлығы кім үшін жасалып жатыр? Ең алдымен, біздің балаларымыз үшін. Бұл – барлық өңірлерге арналған жақсы үлгі», – деп атап өтті Рохус Рохусұлы.
