Астанада Лиганың спорттық-сараптамалық бөлімі биыл ұйымдастырған екі күндік семинарлар сериясының үшіншісі өтті.
Бұған дейінгі шаралардағыдай, бұл жолы да басты назар заманауи цифрлық құралдарды қолдануға аударылды. Атап айтқанда, Freedom Telecom және BigBro компанияларымен бірлескен жоба аясында стадиондарға орнатылған FF Manager платформасы мен Pixellot «ақылды» камераларының мүмкіндіктері таныстырылды.
Алайда, бұл оқу жиынының жөні бөлек – өйткені оған қыздар командаларының бапкерлері қатысты. Семинарда апталық жаттығу микроциклін жоспарлау қағидаттарына ерекше көңіл бөлінді. Бағдарлама теориялық және практикалық сабақтарды қамтыды.
Жиында САБ сарапшыларынан бөлек, Қазақстан WU-17 қыздар құрамасының аға бапкері Юлия Мамонова спикер ретінде сөз сөйледі.
«Бапкерлер ашық диалогқа дайын екенін көрсетіп, өзара және сарапшылармен белсенді түрде пікір алмасты. Өте жағымды атмосферада өз тәжірибелері мен білімдерін бөлісті. Бұл семинар барлық қатысушы үшін пайдалы әрі жемісті болады деп сенеміз.
Семинар үшін апталық микроциклді жоспарлау қағидаттары тақырыбы кездейсоқ таңдалған жоқ. Маусымға дайындық кезінде ауқымды жұмыс атқарылды: біз клубтарды аралап, бапкерлермен байланыс орнаттық. Нәтижесінде дәл осы аспект алдағы чемпионатта үлкен көмек көрсететінін түсіндік», – деп атап өтті Лиганың сарапшысы Жанна Мальгаждарова.
Еске сала кетейік, Freedom QJ League W турнирінің екінші маусымы келесі аптада басталады.
