Freedom QJ League W II туры: футболшылар мен бапкерлер не деді?

«Ақтөбе» – «Қайрат», 1:7

Оксана Коханная, «Қайрат» командасының бас бапкері

– Бәрі бірден жоспарлағандай бола қойған жоқ. Бірінші тайм қиын өтті, Ақтөбеде ауа райы өте ыстық болды. Кейін қыздар өздеріне келіп, ойынды түзеді – мен риза болдым. Екінші таймда қалағанымызды жүзеге асыра алдық – әрі есеп жағынан, әрі ойын жағынан.

Ангелина Остер, «Қайрат» шабуылшысы

– Рахмет. Ойынның басы қиын болды. Біз шоғырлана алмадық, бәріміз ашулы болдық, аптап ыстық қатты әсер етті. Бірақ екінші таймда өзімізді қолға алып, голдар соға алдық.

Азамат Житписбаев, «Ақтөбе» командасының бас бапкері

– Бірінші таймда бәрі жақсы өтті: гол соқтық, допты бақылауда ұстадық. Бірақ бір сәтсіз рикошет ойынның бағытын өзгертті. Қыздарға жанкештілігі үшін алғыс айтамын, ал жанкүйерлерге – үлкен рахмет. Ауа райына үйреніп қалдық, дегенмен физикалық тұрғыда сәл жетіспей қалған шығар. Енді келесі ойынға дайындаламыз.

Алуа Қалиева, «Ақтөбе» шабуылшысы

– Өте қиын болды. Жеңіске жетуге қатты тырыстық, бірақ көп қателіктер кетті. Бірінші аймақ әлсіз болды, шабуылда да қателер болды. Бірақ біз – командамыз, бірге боламыз, ойнауды жалғастырамыз. Өзімнің голымды «Избушкаға», Дильназға арнаймын.

«Ертіс» – «Ордабасы», 0:2

Ербол Сарман, «Ордабасы» командасының бас бапкері

– Қарсылас өте мықты болды. Біздің қыздар жас, 2011 жылы туған. «Ертіс» – өте жақсы команда, бүгінгі ойын оңай болған жоқ. Кей тұста бізге сәттілік серік болды – бұл футбол. Лигаға алғыс айтамын, ұйымдастыру жоғары деңгейде болды.

Сабина Үсен, «Ордабасы» қақпашысы

– Бұл ауыр ойын болды. Қарсылас мықты ойнады. Жеңіс оңай келген жоқ. Баршаға ойын үшін рахмет.

Ксения Постовая, «Ертіс» командасының бас бапкері

– Ойын жағынан – бізде өзіміздің ойын үлгісі бар, техникалық мүмкіндігіміз де жоғары деңгейде. Бірақ бұл жолы ойынға деген дайындық пен жігер мүлде болмады. Бұл әсіресе бірінші таймда қатты байқалды. Ойлаймын, бұл біз үшін үлкен сабақ болады.

Алдыңғы әсерлі ойын мен толық трибуналардан кейін қыздар бұл жолы да солай болады деп ойлап, күш салмай қойған шығар. Апта бойы жаттығудағы көңіл-күй де онша болмады. Мүмкін, бұл апталық микроциклге жаңа ғана кіріскенімізбен байланысты болар. Жұмыс істейміз.

Бұл жеңіліс – команда мен бапкерлік штаб үшін жақсы бір "мұрнына шертпе" болды деп ойлаймын. Енді дайындықты күшейту керек.

Стелла Бабурчина-Луклянец, «Ертіс» қақпашысы

– Айып доптарын, бұрыштан берілген пастарды және жалпы қақпаға бағытталған соққыларды іске асыра алмадық. Сәл ғана жетпей қалды. Қандай қорытынды? Команданы да, өзімізді де дұрыс дайындау керек, жақсырақ ойнау қажет. Көңіл-күй – қалыпты. Жеңіле білуді де үйрену керек.

«Жетісу» – «Астана», 1:7

Болат Сағынбаев, «Астана» командасының бас бапкері

– Қарсыласқа дайындалдық. Ойын үшін оларға алғыс айтамын. Қыздар бапкерлік тапсырманы орындап, жоспарлағандай ойнады. Барлық командамды атап өткім келеді. Ауа райы қиын болды, өте ыстық еді. Футболшы қыздар шыдап бақты, жарайсыңдар.

Әлзия Жамбыл, «Астана» командасының жартылай қорғаушысы

– Бірінші тайм жеңіл өтті, ал екінші таймда эмоциялар көп болды. Мұндай ыстықта екі тайм ойнау қиынға соқты, бірақ соңына дейін шыдадық. Ал жалпы, егер ауа райын есепке алмасақ, ойлағанымыздың бәрі жүзеге асты.

Қанат Сағымов, «Жетісу» командасының бас бапкері

– Турнирді жоғары деңгейде ұйымдастырғаны үшін Лигаға алғыс айтамын, нағыз футбол мерекесі болды. «Астана» – қимылы шапшаң, байсалды команда, ойыншылары бір-бірін жақсы түсінеді. Бір жылдан бері бірге ойнап жүргені байқалады. Ал біз үшін бәрі алғаш рет болып жатыр, сондықтан жеңістің қуанышы әлі алда деп ойлаймын. Қателіктермен жұмыс істеуіміз керек. Жағдай жақсы, ойнайтын алаң бар. Қателерді түзетіп, физикалық деңгейімізді көтеріп, жақсы ойындарға ұмтыламыз. Болашақта жанкүйерлерімізді қуантамыз деп үміттенемін.

Нұрай Болатова, «Жетісу» командасының жартылай қорғаушысы

– Қатты шаршадық. Командамыздың бірнеше ойыншысы жарақат алды, ал кейбіреулерінде ойын тәжірибесі аз болды. Бізді қолдаған жандарға алғысымды білдіремін, жанкүйерлерге үлкен рақмет. Келесі ойында жақсы нәтиже көрсетеміз деп үміттенеміз.

«Шахтер» – «Тобыл», 6:2

Владимир Павлюк, «Тобыл» командасының бас бапкерінің көмекшісі

– Ең алдымен, «Шахтер» командасын жеңісімен құттықтаймын. Біздің команда жалпы алғанда ойынға арналған тапсырманы орындады. Бұл – екінші сырт алаңдағы матч, қыздарда қобалжу байқалды. Қателіктермен жұмыс істейміз, енді өз алаңымыздағы ойынға дайындаламыз, ұпай алуға тырысамыз. Ойын басында екі мүмкіндікті пайдалана алмадық. Футболдың заңы – сен соқпасаң, саған соғады.

«Шахтер» – жақсы қарсылас, ойыны үйлесімді. Қыздары жақсы ойнады, құрамадағы ойыншылары да бар, бізде де бар. Алдағы турларда сәттілік тілеймін.

Амура Қарабаева, «Тобыл» командасының жартылай қорғаушысы

– Ойын жаман болған жоқ. Өз қыздарыма алғыс айтқым келеді – соңына дейін ойнап, күресті. Олармен мақтанамын. «Шахтермен» ойнағанда әрдайым нағыз шайқас болады, олармен ойнау – бір ғанибет.

Сырт алаңда ойнау оңай емес, бірақ біз кез келген жерде ойнауға дайынбыз – өз алаңымызда да мықты қарсылас боламыз.

Сергей Поленов, «Шахтер» командасының бас бапкері

– Ең алдымен, қыздарға ойын үшін алғыс айтқым келеді. Бірінші турдағы айтарлықтай «сабақтан» кейін психологиялық тұрғыда дайын болу қиынға соқты, бірақ осы микроциклде біраз жұмыс жасадық. Қыздар жарады. Құрамда жарақат алғандар көп болса да, алаңға шыққандар бар күшін салды. Әрине, қателіктер болды. Оларды талдаймыз, әрі қарай қозғала береміз.

Өкінішке қарай, бірінші ойында негізгі қақпашымыз Дарина Қарабекова жарақат алып, мениск жыртылып кеткен. Қазір отаға дайындалып жатыр. Ол – жас қыз, мысықтай қимылдап, әрқашан шайқасқа ұмтылады. Жылдам қалпына келеді деп үміттенеміз, басқа да жарақат алған қыздар сияқты. Футбол – жарақат алу қаупі жоғары спорт, бұдан ешкім сақтандырылмаған.

Айым Диханбай өзіне сенімді ойын көрсетті. Әрине, қобалжу болды, бірақ ірі қателікке жол берген жоқ. Еңбектеніп, тырысса, жақсы қақпашы болып өсуі мүмкін.

Анастасия Зеленинаның да жарақат алғаны бар, ол бойынша медицина штабы жұмыс істеп жатыр. Сандер де ұлттық құрама сапарынан келіп, екі ойынды өткізіп алды. Құрамада екінші нөмірмен тұрған қыздар өз мүмкіндігін алып, оны тиімді пайдаланып жатыр. Бұл – команда ішіндегі салауатты бәсекелестік.

2008 жылғы ойыншыларға қатысты бізде белгілі бір міндеттемелер бар, сол себепті олардың барлығын босаттық. Енді 2009–2010 жылғы құраммен ойнаймыз, бұл – даму бағыты. Қыздар «бізден басқа ешкім» деп ұрандап, алға қадам жасап жатыр, өздеріне жүктелген тапсырмаларды орындайды. Біртіндеп ойынды жетілдіреміз: жеке шеберлікті де, командалық өзара әрекетті де.

Дамира Мақсат, «Шахтер» командасының шабуылшысы

– Команда бұл ойынға жақсы дайындалды, біз матчқа аса жауапкершілікпен қарадық. Ойлаймын, біз жанкүйерлердің алдында ақталдық, жақсы футбол көрсеттік, бапкерді де жерге қаратпай, берген тапсырмаларын орындадық. Павлодардағы жеңіліс – өткеннің еншісінде. «Тобылмен» жаңа күшпен алаңға шықтық. Меніңше, аса қиын болмады.

Айып добын алған кезде Дана соғуға кеңес берді. Бастапқыда мен айналдырып соғамын деп ойладым, бірақ қашықтық тым алыс болғандықтан, күшпен соғуға шешім қабылдадым. Бұл голымды анама арнаймын.