Абдуалидің покері және «Ордабасының» қола жүлдесі: Freedom QJ League 21-туры қалай өтті

Маусымның аяқталуына бір тур қалғанда барлық жүлдегер анықталды: «Қайраттың» алтыны мен «Шахтердің» күмісіне «Ордабасының» қола жүлдесі қосылды. Бесінші орын үшін және турнирлік кестенің төменгі бөлігіндегі тартыс әлі де жалғасуда.

Абдуали «Шахтердің» үйдегі жеңісті сериясын тоқтатты

«Қайрат» маусым соңындағы ең маңызды сынақтан сенімді өтті: Қарағандыда чемпиондар «Шахтерді» 4:1 есебімен жеңді. Бұған дейін «кеншілер» осы маусымдағы өз алаңында өткізген 10 матчтың бәрінде жеңіске жеткен еді.

«Сары-қаралардың» төрт голын да Сұлтанәлі Абдуали соқты. Шабуылшы 10-минутта есеп ашып, үзілістен кейін 64, 75 және 82-минуттарда тағы үш рет мергендік танытты. Алаң иелері тек 90-минутта жауап қайтарды: жұбаныш голын Дамир Юсупбеков соқты.

Енді Абдуалидің еншісінде 13 гол бар. Бұл оның командаласы Роман Черноморец пен «Шахтердің» ойыншысы Расул Акимовтың көрсеткішімен бірдей. Үшеуі де сұрмергендер тізімінде үшінші орында тұр. Айта кетейік, үздік бестіктегі футболшылардың арасында Сұлтанәлі алаңда ең аз уақыт өткізген – 940 минут.

Қарағандылықтар соңғы 11 турдағы алғашқы жеңілісіне ұшырады. «Шахтер» биылғы маусымдағы екі жеңілісін де «Қайраттан» тапты: бірінші айналымда алматылықтар өз алаңында 3:1 есебімен басым түскен.

59 ұпай жинаған «Қайрат» былтырғы чемпиондық көрсеткішінен (58 ұпай) асып түсті. Соңғы турда алматылықтар «Таразды» қабылдайды. Егер жеңілмесе, команда алдыңғы екі маусымдағыдай чемпионатты бірде-бір жеңіліссіз аяқтайды.

«Ордабасы» қола жүлдені мерзімінен бұрын иеленді

Шымкенттіктер Павлодарда «Ертісті» 5:0 есебімен ойсырата жеңіп, үшінші орынды қамтамасыз етті. Бұл – «Ордабасының» биылғы маусымдағы ең ірі жеңісі.

Кездесудің тағдыры бірінші таймда-ақ шешілді. 27-минутта Арда Ақжан есеп ашты, 34-минутта екінші тур қатарынан гол соққан Дилшод Назимбеков есепті еселеді. Ал үзіліске аз уақыт қалғанда Бекжан Мұратбектің автоголынан кейін айырмашылық ұлғая түсті.

Екінші таймда Әділбек Тұрдах пенальтиді сәтті орындады, ал 89-минутта алаңға қосалқы құрамнан шыққан Диар Берікбай осы маусымдағы алғашқы голын соқты.

Тұрдахтың еншісінде 15 гол бар. Бұл – 20 гол соққан Дәулет Орынбасардан кейінгі турнирдегі екінші нәтиже.

Осы жеңіс «Ордабасының» үш матчқа созылған жеңіссіз сериясын тоқтатып, Әуелбек Дербісбаев командасының қола жүлдесін қамтамасыз етті. Шымкенттіктердің 37 ұпайы бар, ал «Тобыл» ең көбі 36 ұпай жинай алады. Бір жыл бұрын «Ордабасы» чемпионатты небәрі алтыншы орында аяқтаған еді.

«Ертіс» екінші матч қатарынан жеңіліп, 15 ұпаймен соңғы орында қалды.

«Тобыл» төртінші орынға тұрақтады

Қостанайда «Тобыл» «Жас Қыранды» 2:0 есебімен жеңді. 23-минутта Назар Захарченко есеп ашты, ал 81-минутта команда капитаны Руслан Жетеновке нәтижелі пас берді. Қақпашы Даниил Нұржанов қақпасына гол жібермеді.

Жетенов екінші тур қатарынан гол соғып отыр. Бір апта бұрын дәл оның қосымша уақытта соққан голы қостанайлықтарға «Ақтөбемен» матчта тең нәтиже алып келген еді. Енді Руслан мен Назардың әрқайсысында бес голдан бар.

«Тобыл» алты матч қатарынан жеңілген жоқ, ал соңғы бес кездесудің төртеуінде жеңіске жетті. Олег Лотов командасының табысына қорғаныстағы сенімді ойын айтарлықтай үлес қосып отыр: 22 жіберілген гол – «Қайрат» (9) пен «Шахтерден» (18) кейінгі лигадағы үшінші үздік көрсеткіш.

Қостанайлықтар енді «Ордабасыны» қуып жете алмайды, есесіне төртінші орынды мерзімінен бұрын қамтамасыз етті: «Ақтөбе» төрт ұпайға артта қалып отыр.

«Жас Қыран» соңғы сегіз турдағы алғашқы жеңілісіне ұшырап, 28 ұпаймен алтыншы орында қалды.

Маңдайша «Ақтөбені» жеңістен айырды

Ақтөбеде алаң иелері 33-минуттан бастап ҚФФ академиясына есе жіберді. Қонақтардың үздік сұрмергені Радмир Хизметов турнирдегі жетінші голын соқты. 62-минутта Әлімжан Тәженов есепті теңестірді.

Матчтың шешуші сәті төреші қосқан бесінші минутта болды: «Ақтөбе» пенальти тебу мүмкіндігіне ие болды, алайда команда капитаны Акбар Сәденов допты қақпа маңдайшасына тигізді. Кездесу 1:1 есебімен аяқталды. Осылайша, екі команданың биылғы маусымдағы екі кездесуі де тең аяқталды: бірінші айналымда 2:2 есебі тіркелген еді.

Бұл – «Ақтөбенің» қатарынан үшінші тең ойыны. «Қызыл-ақтар» алты матчтан бері жеңілген жоқ. 29 ұпаймен бесінші орында тұрған команда соңғы турда «Қайсарды» жеңсе, өзге нәтижелерге қарамастан осы орнын сақтап қалады. Ең жақын қарсыластары – «Жас Қыран» (28 ұпай) мен ҚФФ академиясы (27 ұпай).

«Астана» мен «Қайсар» тағы да жеңімпазды анықтай алмады

Елордада өткен матч 2:2 есебімен аяқталды.

37-минутта Амандық Хамидуллиннің голынан кейін алаң иелері алға шықты. Алайда қонақтар үзіліске дейін және одан кейін көп ұзамай жауап берді: 42-минутта Жалғас Сайлаубек, ал 47-минутта «қасқырлардың» капитаны Нұрым Талғат мергендік танытты. 59-минутта «Астана» шабуылшысы Арсен Испанов есепті теңестірді.

Командалардың Қызылордадағы кездесуі де жеңімпазсыз аяқталған еді – 1:1.

«Астана» қатарынан 12 матчта жеңіске жете алмай келеді. Дегенмен елордалықтар енді соңғы орынға түспейтіні анық: олардың 17 ұпайы бар, ал «Каспий» (16) мен «Ертіс» (15) соңғы турда өзара кездеседі.

«Ордабасымен» өтетін алдағы матчта «Астана» өзінің үздік сұрмергені Арсен Испановсыз (6 гол) ойнайды. Ол төртінші сары қағазын алды.

«Қайсар» үш матч қатарынан жеңілмей, 22 ұпаймен сегізінші орында тұр.

«Каспий» тағы да 89-минутта жеңілістен құтылды

Тараздағы матчтың басым бөлігі алаң иелерінің пайдасына өрбіді. 30-минутта «Тараздың» үздік сұрмергені Расул Нұрманбай (маусымда 10 гол) есеп ашты, ал 71-минутта Билял Садыков басымдықты еселеді.

Алайда матч соңында «Каспий» таразы басын теңестірді. 87-минутта Рахат Жиенбаев гол соқты, ал 89-минутта оның нәтижелі пасынан кейін Шахмардан Демесін қорытынды есепті орнатты – 2:2.

Екі команда да екінші матч қатарынан 2:2 есебімен тең ойнады. Өткен турда «Тараз» «Ордабасымен», ал «Каспий» «Шахтермен» дәл осындай есеп тіркеген. Оның үстіне, ақтаулықтар сол кездесуде де 89-минутта есепті теңестірген еді.

«Тараз» алты турдан бері жеңіске жете алмай келеді. 21 ұпай жинаған команда тоғызыншы орында тұр және «Қайсардан» бір ұпайға қалып келеді. «Каспий» 16 ұпаймен 11-орында орналасқан.

Турнирлік кестенің төменгі бөлігіндегі басты интрига Ақтауда шешіледі: соңғы турда «Каспий» «Ертісті» қабылдайды. Павлодарлықтарға соңғы орыннан көтерілу үшін тек жеңіс қажет, ал алаң иелерін тең нәтиже де қанағаттандырады. Оның үстіне, «Ертіс» төртінші сары қағазын алған шабуылшы Ярослав Колесниксіз ойнайды.

21-турдан кейінгі үздік сұрмерген: Дәулет Орынбасар («Қайрат», 20 гол).
21-турдан кейінгі үздік ассистент: Аян Аманжолов («Ақтөбе», 9 нәтижелі пас).