ALGA! x Phygital Fest: балалар жаңа жылдық сыйлықтарға ие болды

Іс-шараға серіктес ұйымдардың өкілдерімен қатар, №4 және №6 арнайы мектеп-интернаттарының, сондай-ақ «Таңшолпан» мен «Әсем» балалар үйлерінің тәрбиеленушілері қатысты. Балаларға «кеншілер» командасының капитаны Игорь Шацкий мен танымал киберспортшы Арман Пирманов арнайы барып, жүздесті.

Әр мекеменің тәрбиеленушілеріне PS5 ойын консольдері сыйға тартылды. Сонымен қатар, балалар өз кумирлерімен жүздесу барысында QOFA серіктесі — Dodo Pizza компаниясы ұсынған ыстық пиццадан дәм татты.

Фестиваль мен жаңа жылдық сыйлықтар — ұзақмерзімді әлеуметтік серіктестіктің бір бөлігі ғана. Мектеп-интернаттар мен балалар үйлерінің тәрбиеленушілері алдағы уақытта фиджитал бағытындағы дарындарды анықтау және дамыту бағдарламасына қосылады. Бұл олардың өздерін бір мезгілде футбол алаңында да, киберспортта да сынап көруіне мүмкіндік береді.

Қыс мезгілінде балалар UEL Team командасымен бірлесіп EA FC 26 ойыны бойынша кәсіби сабақтарға қатысады. Ал жаздың келуімен «Шахтер» клубының бапкерлері жасөспірімдердің футбол дайындығына жауапты болады.

Еске сала кетейік, қараша айында өткен QJL Awards салтанатты рәсімінде қайырымдылық аукционы ұйымдастырылып, лот ретінде мадридтік «Реал» шабуылшысы Килиан Мбаппенің жейдесі ұсынылды. Аукцион жеңімпазы — «Қайрат» ФК Қамқоршылық кеңесінің төрағасы Қайрат Боранбаев болды. Оның 3 миллион теңге көлеміндегі ұсынысы фестивальді өткізуге және жаңа жылдық сыйлықтарды сатып алуға бағытталды.

Бұған дейін, бір жыл бұрын, Freedom QJ League Қостанай қаласындағы «Жанұя» балалар үйіне көмек көрсету мақсатында да қайырымдылық аукционын өткізген болатын. Сондай-ақ өткен жылы Лига жанкүйерлермен бірге су тасқынынан зардап шеккендерге 5,5 миллион теңгеден астам қаражат жинап, «Каспий» мен «Қайрат» арасындағы 6-тур матчының билет сатылымынан түскен барлық табысты қайырымдылық қорына аударды.