ALGA! x Phygital Kids Fest қайырымдылық фестивалі Қарағандыда өтті

Фестиваль физикалық және цифрлық әлемді біріктіретін, бүгінде кеңінен танымал болып келе жатқан «фиджитал» форматында ұйымдастырылды. Бұл формат қатысушыларға алуан түрлі, бірегей әрі есте қаларлық тәжірибе сыйлады.

Іс-шара екі бөлімнен тұрды. Алғашқы бөлімге QOFA қамқорлығымен жүзеге асырылып жатқан ALGA! жобасына қатысушы мектептердің оқушылары мен олардың ата-аналары қатысты. Күннің екінші жартысында фестивальге Қарағанды қаласындағы балалар үйлерінің тәрбиеленушілері, сондай-ақ ерекше қажеттіліктері бар балалар қосылды. Жалпы алғанда, фестивальге 150-ден астам бала қатысты.

Балаларға арналған ойын-сауықтар үш аймаққа бөлінді: спорттық, шығармашылық және киберспорттық. Осылайша, әрбір қатысушы өзіне ұнайтын белсенділікті таба алды.

Іс-шара аясында балалар «баспен футбол», текбол секілді ерекше ойындарға қатысып, басқа да қызықты белсенділіктерді тамашалады. Сонымен қатар, қатысушыларға қарағандылық «Шахтер» футбол клубының бапкерлерімен бірге футбол жаттығуын өткізуге және Қарағанды облысының киберспорт федерациясымен, сондай-ақ Лиганың серіктесі Mastercard компаниясымен бірлесіп ұйымдастырылған толыққанды кибертурнирге қатысуға бірегей мүмкіндік берілді.

Бұдан бөлек, балалар іс-шара серіктесі Dodo Pizza ұсынған дәмді пиццамен тамақтанып, фотобудкада көтеріңкі көңіл-күйді естелікке сақтай алды. Фестиваль соңында барлық қатысушыларға сыйлықтар табысталды, ал танымал блогер әрі киберспортшы Арман Пирманов кибертурнир жеңімпаздарын марапаттады.

Еске сала кетейік, қараша айында өткен QJL Awards салтанатты рәсімі аясында қайырымдылық аукционы ұйымдастырылып, лот ретінде мадридтік «Реалдың» шабуылшысы Килиан Мбаппенің жейдесі ұсынылған болатын. Аукцион жеңімпазы – «Қайрат» ФК Қадағалау кеңесінің төрағасы Қайрат Боранбаев, оның жеңімпаздық ұсынысы 3 миллион теңгені құрады. Бұл қаражат фестивальді ұйымдастыруға және балалар үйлерінің тәрбиеленушілеріне арналған жаңа жылдық сыйлықтарды сатып алуға бағытталды.

Бір жыл бұрын Freedom QJ League өткізген қайырымдылық аукционынан түскен қаражат Қостанай қаласындағы «Жанұя» балалар үйіне көмек көрсетуге жұмсалған еді. Сонымен қатар, өткен жылы Лига жанкүйерлермен бірлесе отырып, су тасқынынан зардап шеккендерге 5,5 миллион теңгеден астам қаражат жинады және «Каспий» мен «Қайрат» арасындағы 6-тур матчының билет сатылымынан түскен барлық табысты қайырымдылық қорларының біріне аударды.