Алихан Темірхан – Freedom QJ League B маусымының ең үздік қақпашысы!

Темірхан маусымда 15 матч өткізіп, 76 сейв жасады – бір ойынға орта есеппен 5 рет қақпаны құтқарып отырды. Сонымен қатар ол 4-турдағы ҚФФ Академиясына қарсы өткен ойында қақпасын құрғақ сақтап, «Елімайға» 1:0 есебімен маңыз­­ды жеңіс әкелді.

Лиганың барлық турнирлерінде «ең пайдалы ойыншы», «үздік қақпашы», «үздік қорғаушы», «үздік жартылай қорғаушы» және «үздік шабуылшы» атанған ойыншыларға серіктес Freedom Bank тарапынан 200 000 теңгеден табысталады.

«Бұл мен үшін өте маңызды сәт. Үлкен қуаныш пен алғыс сезініп тұрмын. Номинациядағы жеңіс – еңбегім көрініп жатқанын, дұрыс бағытта келе жатқанымды білдіреді. Бұл әрі қарай өсуге қатты мотивация береді.

Маусым оңай болмады, кей кездері тіпті ауыр болды, бірақ өте мазмұнды әрі пайдалы өтті. Үлкен қадам жасадым, көп нәрсені қайта ой елегінен өткіздім, әрі неге көбірек көңіл бөлу керегін түсіндім.

Келесі маусымға одан да мықты болып келгім келеді – тұрақтылық қосып, ойындағы негізгі элементтерді жетілдіріп, командаға жақсы нәтижелерге қол жеткізуге көмектескім келеді.

Ең есте қалған сәт? Әрине, «Жеңіс» командасына қарсы матч. Сол ойында біз ойынды өз пайдамызға өзгерте алдық. Сол кезде біз бір-бірімізге толық сенгенде қандай күшті бола алатынымызды сезіндім.

Приздық ақшаның бір бөлігін ата-анама бергім келеді. Олар – маған барын салып, уақытын, күшін, қолдауын, сенімін арнаған жандар. Әсіресе қиын сәттерде әрдайым қасымда болғаны үшін оларды аз да болса қуантқым келеді.

Жас жігіттерге айтарым: жауапкершіліктен қорықпаңыздар, эмоциядан қысылмаңыздар. Дебют – әрдайым толқу, бірақ сіздер бұл жерде бекер емессіздер. Еңбек етіңіздер», – деді Алихан сұхбатында.