Атмосфераға толы әрі тосын сыйларға бай уикенд: Freedom QJ League 6-туры қалай өтті

Қалыптасқан дәстүр бойынша бұл тур ерекше өтті. Биыл көптеген ойыншы мектеп бітіреді, сондықтан олар алаңға символдық атрибуттармен – академиялық қалпақтармен және түлектер ленталарымен шықты.

«Қайратты» тоқтату мүмкін бе?

Алматылықтар кезекті ірі жеңісіне қол жеткізіп, өз қақпасына бірде-бір гол жіберген жоқ. Бұл жолы «Қайсар» зардап шекті – «сары-қаралар» қарсылас қақпасына жауапсыз төрт гол соқты.

Абылай Жылқайдар, Ислам Рақым, Алихан Әбді және Роман Черноморец гол авторы атанды. Ислам мен Роман өз есептеріне бір-бір голдық пас жазса, қалған екі нәтижелі пасты Марлен Амренов берді.

Бұл – «Қайсардың» қатарынан төртінші жеңілісі. Қызылордалықтар турнир кестесінің соңында тұр. Дегенмен «қасқырларда» 2-турдан кейінге шегерілген КФФ Академиясымен матч бар. Сол ойындағы жеңіс қазіргі жағдайдан шығуға айтарлықтай көмектесуі мүмкін.

«Астана» жеңісті жұлып алды

«Жас Қыран» жеңілмеген командалар қатарынан шықты – Олег Трофимов шәкірттері өз алаңында «Астанаға» есе жіберді.

Елордалық клуб есепті ерте ашты – 8-минутта Назар Сабитұлы сәтті соққысымен көзге түсті. Алаң иелері матч бойы қақпаға белсенді соққы бағыттады, бірақ оны қақпа жақтауына дәл тигізу тек бір рет, бірінші таймның соңына қарай ғана мүмкін болды – Тимур Ипполитов есепті теңестірді.

Екінші тайм толықтай тартысты өтті, матч тең аяқталатындай көрінген. Алайда қосылған уақытта Арсен Испанов Ибрахим Кумбайдың пасынан кейін гол соқты. Финалдық ысқырық естіліп, «Жас Қыран» қатарынан екінші матчта ұпай жоғалтты.

«Ордабасы» арақашықтықты қысқартты

«Жас Қыранның» сүрінуі «Ордабасыға» тиімді болды. Төртінші орында келе жатқан шымкенттіктер үш ұпайлық айырманы қысқартып, өз алаңында «Каспийді» жеңді.

Алаң иелері есепті 9-минутта ашты – Әділбек Тұрдах көзге түсті. Алайда командалар үзіліске тең есеппен кетті, себебі Амирхан Қуан таразы басын теңестіре алды. Матч тағдыры екінші таймда шешілді: Дияр Рахымжанов алдымен Құдірет Ботабекке нәтижелі пас берді, кейін өзі де гол соқты – 3:1.

Осылайша оңтүстіктіктер үзіліске көшбасшы үштіктің басты қуғыншысы ретінде кетіп барады. Бірақ босаңсуға әлі ерте – турнир кестесі өте тығыз, ал алда «Қайратпен» кездесу күтіп тұр.

Акимов тағы да «Шахтердің» жеңісін әкелді

«Сары-қаралардың» енді бір турдың ішінде белгілі бір жағдайда оларды бірінші орыннан ығыстыра алатын жалғыз қуғыншысы бар – ол қарағандылық «Шахтер». Кеншілер КФФ Академиясын өткен аптада «Тобылды» жеңген сценариймен ұтты: есеп – 2:0, ал Расул Акимов дубль жасады.

Жалғыз айырмашылық – бұл жолы Расул алғашқы голын 11 метрлік айып добын сәтті орындап соқты. Екінші гол ойыннан соғылды. Акимов шабуылды соңына дейін жеткізді: қорғаушылардың белсенді кедергісіне қарамастан, «Шахтер» хавбегі айып алаңында құлап қалса да, тез тұрып, қақпаға соққы жасады.

Нәтижесінде көшбасшы үштіктегі жағдай мынадай: «Қайратта» – 18 ұпай, «Шахтерде» – 16, ал «Жас Қыранның» еншісінде 13 ұпай бар.

Қостанайдағы тартысты соңғы минуттар

«Тобыл» мен «Тараз» 1:1 есебімен тең түсті. Олег Лотовтың командасы 27-минутта есеп ашты, ал оңтүстіктіктер ұзақ уақыт бойы таразы басын теңестіре алмады. Қостанайлықтардың осы маусымда ең аз гол жіберген командалар рейтингінде үшінші орында тұруы бекер емес.

Ақырында «Тараз» өз голын соқты, бірақ ойыннан емес. 80-минутта қонақтар пенальти орындау құқығына ие болып, бұл мүмкіндікті Расул Нұрманбай сәтті пайдаланды.

Көп ұзамай алаңдағы жағдай шиеленісе түсті. Оңтүстіктіктердің айып алаңындағы қақтығыс екі жақтан да ойыншылардың алаңнан қуылуына алып келді – агрессивті әрекеті үшін «Тобыл» хавбегі Назар Захарченко мен «Тараз» қақпашысы Абылай Әлімхан қызыл қағаз алды. Сонымен қатар матч соңында бірнеше ойыншы ескерту алды.

«Тараз» бен «Тобыл» турнир кестесінде көрші болып қала берді: екеуінде де 7 ұпай бар, олар тиісінше алтыншы және жетінші орындарда тұр. Жоғарыда – «Астана» (9), төменде – «Ақтөбе» (7).

Ақтөбедегі нәтижелі матч

«Қызыл-ақтар» үзіліске жақсы көңіл-күймен кетеді – Әсет Айтмағамбетов командасы өз алаңында «Ертісті» 5:2 есебімен жеңді.

«Ақтөбенің» бірден екі ойыншысы дубль жасады – олар Бикжан Жанаев пен Ибрахим Бауыржанов. Команданың бесінші голын Аян Аманжулов соқты. Бұған дейін ол екі нәтижелі пас берген еді – гол соққан әріптестерінің әрқайсысына бір-бірден.

«Ертіс» «Ақтөбенің» сәтті шабуылдарына Ғапур Мержоевтің пенальтиден соққан голымен және Тимур Титаренконың добымен жауап берді.

Павлодарлықтар үш ұпаймен турнир кестесінде соңғының алдындағы орында тұр. Бірақ егер «Қайсар» 30 мамырда КФФ Академиясымен кем дегенде тең ойнаса, «Ертіс» соңғы орынға түсіп қалуы мүмкін. Кейінге шегерілген матчты «қызыл-ақтар» да мұқият бақылауы ықтимал – өйткені флагмандық турнирдің ең жас командасы қазір «Ақтөбеден» небәрі бір ұпайға қалып келеді.