Арғын Жұмагелді – Freedom QJ League B маусымының үздік қорғаушысы!

15 жастағы Арғын турнирде 18 матч өткізіп, 3 гол соқты және 1 голдық пас берді. Оның еншісінде 260 допты тартып алу және іліп алу, сондай-ақ 125 қағып алу бар. Мұнымен қатар, ол 944 пастың 742-сін дәл жеткізіп, 79% дәлдік көрсетті. Жумагелді 261 жекпе-жектің 153-ін жеңіп шыққан.

Лиганың барлық турнирлерінде «ең пайдалы ойыншы», «үздік қақпашы», «үздік қорғаушы», «үздік жартылай қорғаушы» және «үздік шабуылшы» атанған ойыншыларға серіктес Freedom Bank тарапынан 200 000 теңгеден табысталады.

«Бұл марапатты алған сәттегі сезімді сөзбен жеткізу қиын. Еңбегімнің бағаланғаны қатты қуантты және үлкен мотивация сыйлады.

Маусым жалпы жақсы өтті. Қойылған мақсаттардың басым бөлігін орындадық, бірақ әлі де өсуге мүмкіндік бар. Келесі маусымда өз ойынымды жаңа деңгейге шығарып, тұрақты түрде жақсы нәтиже көрсеткім келеді.

Ең есте қалған сәт? Қиын матчтардың бірінде команда болып ойынды өз пайдамызға өзгертіп, жеңіске жеткеніміз. Ол эмоциялар әлі күнге дейін есімде.

Приздық қаржыны пайдалы заттарға жұмсап, анама сыйлық алғым келеді.

Келесі жылы дебют жасайтын жігіттерге айтарым: қысылмаңыздар және өздеріңізге сеніңіздер. Бірінші маусым оңай болмайды, бірақ еңбек, тәртіп және дұрыс орта бәрін өз орнына қояды. Әр мүмкіндікті пайдаланып, өз ойыныңызды көрсетуге қорықпаңыздар. Сәттілік тілеймін!» – деді ол сұхбатында.