Черноморец көш басында, «Қайрат» та қатарда: Freedom QJ League 2-туры қалай өтті

«Шахтердің» екі жылдам голы

Қарағандылықтар «Ертіске» қарсы матчтағы тапсырмасын бірінші таймда-ақ орындады. 8-минутта Нұрали Азатқазы есеп ашса, 13-минутта Рустам Сайфимилюков есепті еселей түсті.

Одан кейін ойын біршама тынышталды. Ашық ойыннан гол соғылмады, бірақ қосымша уақытта «Ертіс» шабуылшысы Гапур Мержоев пенальтиді дәл орындады. Павлодардағы матч «Шахтердің» 2:1 жеңісімен аяқталды.

Бірінші турда «Қайраттан» ірі есеппен жеңілген «Ертіс» турнир кестесінің соңында қалды. Ал «Шахтер» қатарынан екі жеңістен кейін үздік үштікке енді.

Черноморец «Қайратқа» жеңіс сыйлады

«Қайрат» «Астананы» сенімді түрде жеңді – қонақтар елордада 4:0 есебімен басым түсті.

Төрт голдың үшеуіне 15 жастағы Роман Черноморец қатысып, дубль жасап, Дәулет Орынбасарға нәтижелі пас берді. Тағы бір голды Альфир Ханафи соқты.

Еске салсақ, өткен турда Черноморец «Ертіс» қақпасына екі гол соққан еді. Қазір екі матчтан кейін 4 голмен бомбардирлер тізімін бастап тұр және «гол+пас» көрсеткіші бойынша да көшбасшы (4+1). Өткен маусымда ол U-17 турнирінің үздік сұрмергені атанған – енді бұл жетістікті жаңа деңгейде қайталай ала ма?

«Тобылдың» өз алаңындағы жеңісі

«Қайсар Аренадағы» жеңілістен кейін «Тобыл» дұрыс қорытынды шығарып, Қостанайда «Ордабасыны» ұтты. Олег Лотов шәкірттері 19-минутта алға шықты – Руслан Джетенов пенальтиді дәл орындады.

Қонақтар есепті теңестіре алмады, ал матчтың соңында Наби Таласбек Ілияс Бағытжанның пасынан кейін есепті 2:0-ге жеткізді.

Мұсаев «ақ-қызылдарға» жеңіс әкелді

Бірінші турда «Ордабасыдан» жеңілген «Ақтөбе» бұл жолы ұпай алды.

Матч тағдырын қосалқы құрамнан шыққан Азамат Мұсаев шешті. Ол жастар командасында ойнаса да, осы турда екі гол соғып, жасөспірәмдер командасына көмектесті. «Каспий» тек Әлихан Жұмабайдың дәл соққысымен жауап берді.

Бұл – «Каспийдің» қатарынан екінші рет 1:2 есебімен жеңілуі.

«Жас Қыран» стадионындағы алты гол

Алматыда өткен «Жас Қыран» мен «Тараз» арасындағы матч өте нәтижелі болды – 4:2.

Үзіліске дейін алаң иелері екі гол соқты – Алан Луканин мен Надер Мовафи Махмуд көзге түсті.

Екінші тайм басында «Тараз» пенальтиден бір гол қайтарды (Мұхаммет Шүкірәлиев). Бірақ кейін Луканин дубль жасады, ал Сергей Шарунов есепті ұлғайтты. Соңғы голды қонақтар сапынан Расул Нұрманбай соқты.

Осылайша, «Жас Қыран» екі турдан кейін «Қайрат» және «Шахтермен» бірге көшбасшылар қатарында. Ал «Тараз», «Каспий» және «Ертіс» турнир кестесінің төменгі бөлігінде.

ҚФФ Академиясы мен «Қайсар» арасындағы матч Шымкентте өтетін «Даму кубогына» байланысты 30 мамырға ауыстырылды.