Алғашқы айналымның қорытындысы: Freedom QJ League-тің 11-турына шолу

«Ақтөбе» – «Каспий»: батыстағы текетірес

Ақтаулық клуб соңғы үш турда алты ұпай жинап, чемпионаттың алғашқы айналымын соңғы орыннан жоғары аяқтауға мүмкіндік алды – ол үшін қонақта «қызыл-ақтарды» жеңу қажет.

Алайда бұл оңайға соқпайды – «Ақтөбе» өз алаңында өте сенімді ойнайды: екі жеңіс, бір тең ойын және «Жас Қыраннан» аздаған айырмашылықпен жеңілген матч. Команданың үздік сұрмергені Ислам Нурадинов соңғы екі матчта гол соққан жоқ – осы турда нысананы дәл таба ала ма?

«Ордабасы» – «Шахтер»: кім нақты көшбасшы?

Өткен турда «Астананы» соңғы минутта жеңіп, ұзақ жеңіліс сериясын үзген шымкенттік клуб осы турда «Шахтермен» кездеседі – бұл команда қазір «Қайраттан» кейінгі ең тұрақты ұжым, тек соларға ғана есе жіберген.

«Ордабасы» үшін басты қауіп – жарқырап жүрген Глеб Макридов. 18 жастағы жартылай қорғаушы соңғы үш матчта 9 нәтижелі әрекет жасап үлгерді. Ал «Астанаға» қарсы ойында Максим Гамаюнов (1+1) жақсы өнер көрсетті – ол осы демалыста да жарқырай ма?

«Тараз» – «Қайрат»: қорғаныс қай жақта мықты?

Алғашқы айналымның соңғы матчында ең аз гол жіберген екі команда кездеседі – «Тараз» бен «Қайраттың» еншісінде 12-ден гол жіберу бар. Алайда шабуылда айырмашылық жер мен көктей: «Қайрат» 55 гол соқса, «Тараз» небәрі 13.

«Қайрат» шабуылшылары Абылай Төлеухан мен Дәулет Орынбасар сұрмергендер жарысында жеке дара келеді – сәйкесінше 12 және 10 гол. Оңтүстік қақпашысы Санжар Рахматилі мен жартылай қорғаушы Азизжон Бердиевтің қызыл карточкалары статистиканы жақсартуға сеп болуы мүмкін.

«Атырау» – «Ертіс»: иесінде үзілмеген серия бар ма?

«Мұнайшылар» қатарынан төрт рет жеңілді – бұл аралықта олар тек екі гол соқты. «Ертіс» болса, үшінші турдағы «Қайраттан» ірі жеңілістен кейін тек екі матчта ғана минималды есеппен ұтылды.

Соңғы кездері Алмас Рахымбек өте жақсы формада – соңғы үш матчта үш гол мен үш ассист. Ол серияны жалғастыра ма?

«Қайсар» – «Тобыл»: барлығы болуы мүмкін

Маусым аутсайдерлерінің кездесуінде кез келген нәтиже тіркелуі мүмкін. Екі команда да турнирлік кестедегі жағдайына қарамастан, үздік алтылықтағы клубтардан ұпай тартып жүргенін көрсетті. «Қайсар» өз алаңында жақсы ойнайды – ал «Тобыл» барлық сырт алаң матчтарында жеңіліп келеді.

«Жас Қыран» – «Астана»: алматылықтар жеңілмеген кезеңді соңына шығара ма?

«Жас Қыран» маусымның алғашқы айналымын жеңіліссіз аяқтауға бір қадам қалды – тек өз алаңында «Астанадан» ұтылмау керек.

Ал елордалықтар үш матч қатарынан жеңіске жете алмай жүр. Оған қоса, Ербол Мусабаев бұл турда Ален Пак, Максат Абраев және Руслан Валиханнан айырылып отыр – олар «Астананың» екінші құрамына шақырылды. Қонақтар осындай жағдайда жеңіске жете ала ма? Жақында білетін боламыз.

Лиганың спорттық-сараптамалық бөлімінің Telegram арнасына жазылыңыздар

«БАСПЕН ОЙНА» шоуының жаңа шығарылымын көріңіздер!