Freedom QJ League B 5-турындағы басты сәттер: соңғы минуттардағы камбэктер мен бомбардирлер жарысы

Шымкенттегі триллер

«Оңтүстік» пен «Қызылжар» өте қарқынды әрі тартысты матч өткізді, ал алаң иелері жеңілістен тек соңғы сәттерде аман қалды.

«Қызылжар» есепті 3-минутта Иван Волгиннің голымен ашты, оған пас берген — Ислан Итикеев. Алайда 7-минутта Никита Горбачев автогол соғып алды, ал 25-минутта Диас Ибадулла шымкенттік команданы алға шығарды.

Көп ұзамай «Оңтүстік» бір ойыншысынан айырылды — Темірлан Ермек қызыл қағаз алды. Артынша Итикеев алты минут ішінде дубль жасады, бірақ 67-минутта шымкенттік шабуылшы Алихан Әли таразы басын теңестірді. Бес минут өткен соң Адилхан Аманжол «Қызылжарды» қайта алға шығарды, алайда негізгі уақыттың соңғы сәттерінде Оралхан Құлмұрат таразы басын қайта теңестірді — 4:4.

Матч соңында Құлмұрат дөрекі ойыны үшін алаңнан қуылды. Барлығы ойын барысында 12 ескерту тіркелді.

«Оңтүстік» әлі де КФФ академиясын қуып жетуге тырысып жатыр — көш бастап тұрған қарсыласын олар екі ұпайға ғана жіберіп алды. «Қызылжар» әзірге турнир кестесінде 6-орында тұр.

«Жеңіс» сырт алаңда құтқарылды

Талдықорғандық «Жетісу» мен астаналық «Жеңіс» негізгі уақыт біткенше бір-бірінің қақпасын дәл таба алмады. Есеп ашылмай қалатындай көрінді. Бірақ қосымша минуттарда астаналық шабуылшы Ақбар Туғанбаев қарсылас қақпасын дәл көздеп, Freedom QJ League-дегі алғашқы голын соқты.

Қазір «Жеңістің» 5 ойыннан кейін 7 ұпайы бар — команда 7-орында. Ал 4 ұпай жинаған «Жетісу» 9-орында келеді.

Қалымжанов пен Әли — бомбардирлер жарысында көш бастап тұр

«Оқжетпестің» жартылай қорғаушысы Тамирлан Қалымжанов «Ұлытаумен» сырт алаңдағы кездесуде жеңіс добын соғып (3:2), маусымдағы жетінші голын еншіледі — бұл лигадағы ең жоғары көрсеткіш. Сондай-ақ дәл осындай жетістікке «Оңтүстіктің» шабуылшысы Алихан Әли де жетті. Ол екі нәтижелі паспен «гол+пас» жүйесінде де көш бастап тұр. Қалымжановта бұл көрсеткіш 7+1.

Бұл екеуінің ізін басып келе жатқан — «Оңтүстікті» жеңілістен құтқарған Оралхан Құлмұрат. Оның еншісінде бес турда бес гол бар.