Қыздар турнирінің өткен матчтарындағы басты оқиғалармен бөлісеміз.
«Ордабасы» «Астананы» тоқтатты
Турдың басты сенсациясы Шымкентте тіркелді. Турнир кестесінде небәрі алтыншы орында келе жатқан «Ордабасы» чемпионаттың екінші командасын 2:1 есебімен жеңді.
16-минутта алаң иелерінің капитаны Диана Ситникова есеп ашты, алайда бірінші таймның соңына қарай Ляйсан Биккинина таразы басын теңестірді. Матч тағдырын 75-минуттағы эпизод шешті: Зарэма Максот допты абайсызда өз қақпасына бағыттап алды.
«Астана» үшін бұл маусымдағы екінші жеңіліс қана, бірақ ол өте қолайсыз сәтте орын алды – «Қайраттан» екі ұпай қалып келе жатқан елордалықтардың айырмасы бес ұпайға дейін ұлғайды, ал маусымның соңғы бөлігінде бұл өте маңызды. «Ордабасы» болса, екі жеңілістен тұратын сериясын тоқтатып, 13 ұпаймен алтыншы орында қалды.
«Шахтер» матч соңында жеңісті жұлып алды
Қарағандыда «Шахтер» «Актобені» 2:1 есебімен жеңді. Алаң иелері 23-минутта Амина Аужанованың голының арқасында алға шығып, ұзақ уақыт бойы минималды басымдығын сақтап тұрды.
Матчтың шешуші сәттері соңғы минуттарға келді. 83-минутта Айзере Қуанышқали есепті теңестірді, алайда төрт минуттан кейін қонақтар азшылықта қалды – агрессивті әрекеті үшін Назым Кулетова қызыл қағаз алды. «Актобе» қайта құрылып үлгермеді: 88-минутта Дария Тулегенова жеңіс голын соқты. Бұл оның маусымдағы жетінші добы.
Бұл «золушкалардың» қатарынан үшінші жеңісі. 20 ұпай жинаған команда үшінші орынға бекініп, «Актобеден» үш ұпайға ұзап кетті.
Қызылордадағы Сартаеваның дублі
«Тобыл» сырт алаңда «Қайсарды» 4:0 есебімен сенімді жеңді, дегенмен бірінші тайм голсыз аяқталды.
Барлығы үзілістен кейін шешілді: Алина Сартаева бес минут ішінде дубль жасады, кейін Евгения Страх та мергендігімен көзге түсті. Ал 82-минутта Амура Карабаева пенальтиді дәл орындап, матчтың нүктесін қойды.
Қостанайлық команда бесінші орынға көтеріліп, ұпай саны бойынша «Актобемен» теңесті – осылайша қола жүлде үшін күреске бірден үш клуб араласып отыр, дегенмен «Шахтердің» айқын басымдығы бар.
«Қайсар» болса, турнир кестесінің соңғы орнында қалып отыр – 12 турдан кейін 3 ұпай және доп айырмасы 6:54.
«Қайрат» чемпиондыққа бір қадам қалды
Чемпионат көшбасшысы Алматыда «Ертіске» еш мүмкіндік бермеді – 4:0. София Ягудина дубль жасаса, Елизавета Остертак пен София Яшкова бір-бір голдан соқты. Яшкова өз добын пенальтиден енгізді. Бір қызығы, бұл кездесуде бірде-бір карточка көрсетілген жоқ.
12 турдан кейін «Қайраттың» еншісінде мүмкін болған 36 ұпайдың 33-і бар. Команда 70 гол соғып, небәрі 7 доп жіберді. Маусымның аяқталуына екі тур қалды, енді бір ғана жеңіс алматылықтарға чемпиондықты кепілдейді: «Астана» қалған екі матчын да жеңген күннің өзінде ең көбі 34 ұпай жинай алады.
«Ертіс» қатарынан төртінші рет жеңіліп, 7 ұпаймен жетінші орында қалды.
12-турдан кейінгі үздік сұрмерген: Милена Николенко («Қайрат», 20 гол).
12-турдан кейінгі үздік ассистент: Жания Махаш («Қайрат», 13 нәтижелі пас).
