«Шахтерге» арналған емтихан және аутсайдерлердің шайқасы: Freedom QJ League W бесінші туры алдындағы маңызды мәліметтер

«Тобол» – «Ертіс»

Алдыңғы турда қос команда да қарсыластарын жеңіп шықты, бірақ оңайға соқпады. Павлодарлықтар маусымда алғаш рет көшбасшылардың бірі «Астананы» тізе бүктірсе, Денис Сафронов баптайтын «Тобыл» маусымның аутсайдерлерінің бірі – «Ақтөбемен» ойында жеңісті әрең сақтап қалды.

«Ертістің» бас бапкері Ксения Постовая «Астанаға» қарсы өткен кездесуден кейін командаға бірнеше күн демалыс берілетінін айтқан еді – бұл үзіліс «Тобылмен» ойында қалай әсер ететінін көреміз.

Қостанайлық команданың негізгі ойыншыларының бірі Амура Қарабаева бұл матчта алаңға шықпайды – естеріңізге сала кетейік, ол «Актобемен» кездесуде орын алған жанжал үшін қызыл қағаз алған болатын. Соңғы үш ойында нәтижелі әрекеттерімен көзге түскен 15 жастағы жартылай қорғаушының орнын бұл жолы басқа ойыншы алмастыруы мүмкін.

«Қайрат» – «Шахтер»

Павлодардағы сәтсіз бастамадан кейін қатарынан үш матчта жеңіске жеткен қарағандылық команда үшін бұл тур – бірінші айналымдағы басты емтихан. Сергей Поленовтың шәкірттері «Қайратты» тоқтата ала ма?

Мәселені күрделендіретін жайт – енді «Күлбикештер» негізгі құрамдағы джокерлерінсіз ойнайды: 2008 жылы туған қыздар енді ересектер сапында өнер көрсетеді. Алайда бұл өзгеріс «Шахтердің» негізгі шабуыл күшіне әсер етпейді – шабуыл шебінде 2010 жылы туған Дамира Мақсат пен Саида Дюсембаева жұбы сол қалпында қалады.

Айтпақшы, Мақсат бұл ойында ерекше ынтамен өнер көрсетуі мүмкін. Қазіргі таңда ол алты нәтижелі паспен ассистенттер жарысының көшін бастап тұр. Оның ең басты бәсекелесі – «Қайрат» ойыншысы Жания Махаш – бар болғаны бір нәтижелі пасқа ғана артта келеді.

«Астана» – «Ордабасы»

Соңғы екі аптада «Ордабасыға» оңай соқпай тұр – шымкенттік қыздар қатарынан «Шахтер» мен «Қайратқа» жеңіліп қалды.

Ал «Астана» өткен турда «Ертіске» есе жіберді. Егер оңтүстік арулары жүлделі үштікке қайта оралғысы келсе, елордалық команда үшін бұл матчта жеңіске жету аса маңызды – Шымкентте ірі есеппен жеңіске жеткен «Қайрат» турнир кестесінде үш ұпайға алға шығып үлгерді.

«Жетісу» – «Ақтөбе»

Бұл матчтан кейін бір команда алғашқы ұпайын алады: еске сала кетейік, жетісулықтар да, «ақ-қызылдар» да бұған дейінгі барлық ойындарында жеңілген болатын.

Айта кету керек, талдықорғандық футболшы қыздардың өз алаңында ойнаудан бөлек тағы бір артықшылығы бар – «Ақтөбеге» жоғарыда аталған жанжалға қатысқаны үшін дисквалификация алған Арай Тілегенова мен Алсу Темірбекова көмектесе алмайды.