Алғашқы секундттардан-ақ: Лига тарихындағы ең жылдам 15 гол

15-орын – Софья Рыбак «Жетісу» қақпасына (54-секунд)

2025 жыл, Freedom QJ League W 9-туры

Бұл гол «Астана» W командасының 2025 маусымындағы ең ірі жеңісінің бастамасы болды. Естеріңізге сала кетейік, матч 17:2 есебімен аяқталды.



14-орын – Ербол Құрманахан «Алтай» қақпасына (54-секунд)

2024 жыл, Freedom QJ League U-17 B 2-туры

Бұл эпизод тек Құрманаханның жылдам голымен ғана емес, «Алтайдың» лезде жауап қайтаруымен де қызықты – Магомед Құсайыновтың арқасында есеп екінші минутта-ақ теңесті.



13-орын – Диас Түлеу «Ордабасы» қақпасына (47-секунд)

2023 жыл, Freedom QJ League 16-туры

Бұл гол қорғаныстағы өрескел қателіктің салдары болды, бірақ соған қарамастан әсерлі шықты. Өкінішке қарай, өткен жылдың қазан айында Диас Түлеу өмірден өтті.



12-орын – Абдулмансұр Хасан «Ақсу» қақпасына (46-секунд)

2024 жыл, Freedom QJ League U-17 B 10-туры

Бұл ойында тек алғашқы минутта ғана емес, қосымша уақытта да гол соғылды – «Атырау» 3:0 есебімен жеңіске жетті.



11-орын – Нұрхад Нұрымов «Шахтер» қақпасына (41-секунд)

2025 жыл, Freedom QJ League U-16 15-туры

Матч «Қайраттың» 8:1 есебіндегі сенімді жеңісімен аяқталды.



10-орын – Дәулет Орынбасар «Астана» қақпасына (39-секунд)

2024 жыл, Freedom QJ League U-17 18-туры

Дәулет Лигада 50 гол соғып үлгерді – бірақ дәл осы «Астанаға» соққан добы ол үшін ерекше болғаны анық.



9-орын – Нұрсат Қошқарбек «Ордабасы» қақпасына (37-секунд)

2025 жыл, Freedom QJ League U-16 2-туры

Он минуттан кейін Ерсұлтан Біртай «Қайсардың» басымдығын арттырды. Алайда кейін Бекасыл Қанат дубль жасап, матч тең аяқталды.



8-орын – Роман Черноморец «Шахтер» қақпасына (33-секунд)

2025 жыл, Freedom QJ League U-17 15-туры

Айта кетейік, 26-минутта Роман есепті еселеді. Алматылықтар матчты 6:0 есебімен жеңді.



7-орын – Диёрбек Мұлажанов «Тараз» қақпасына (33-секунд)

2023 жыл, Freedom QJ League 9-туры

Бұл матчта «Тараз» тез ес жиып, 12-минутқа қарай алға шықты – алаң иелері сапындағы ең жарқын ойыншы Димаш Серікұлы болды. Ойын 3:3 есебімен аяқталды.



6-орын – Полина Арланова «Жетісу» қақпасына (31-секунд)

2025 жыл, Freedom QJ League 13-туры

«Ертіс» 16:1 есебімен ірі жеңіске жетіп, Полина хет-трик авторы атанды.



5-орын – Бекзат Сапарбай «Ақсу» қақпасына (28-секунд)

2024 жыл, Freedom QJ League 21-туры

Бұл ойында Бекзат қызық жағдайға тап болды: жылдам голдан кейін оның командасы тағы екі рет гол соқты, бірақ кейін Сапарбай автогол авторы атанды. Нәтижесінде «Ақсу» камбэк жасап, матч 3:3 есебімен аяқталды.



4-орын – Артур Гарифуллин «Қайсар» қақпасына (27-секунд)

2026 жыл, Freedom QJ League U-15 1-туры

14 жастағы Гарифуллин Лигадағы дебютін жарқын өткізді – оның жылдам голы «Тобылдың» 7:0 есебіндегі ірі жеңісінің бастамасы болды. Артур өзі хет-трик жасады.



3-орын – Алмат Әуелхан «Тараз» қақпасына (21-секунд)

2025 жыл, Freedom QJ League U-16 18-туры

Бұл жылдам гол «Жас Қыранға» көмектесе алмады – «Тараз» 3:1 есебімен жеңіске жетті.



2-орын – Оралхан Құлмұрат «Алтай» қақпасына (20-секунд)

2025 жыл, Freedom QJ League B 12-туры

«Оңтүстік» 7:0 есебімен жеңіп, Құлмұрат дубль және нәтижелі пасымен көзге түсті.



1-орын – Виктор Лакеев «Каспий» қақпасына (9-секунд)

2024 жыл, Freedom QJ League 1-туры

Абсолютті рекорд. Лакеев дубль жасады, Алан Адахаев та оны қайталап, «Жас Қыран» 4:1 есебімен жеңіске жетті.