Fantasy QJ League күміс жүлдегері Михаил Мамонтов: «Келесі жылы да қатысамын»

Биыл күміс жүлдені «Шахтер» жастар командасының ойыншысы Михаил Мамонтов жеңіп алып, басты сый – PlayStation 5 консоліне ие болды.

Өткен жылы Freedom QJ League-да өзі де ойнаған Михаил фэнтези-турнирге қатысудан алған әсерімен бөлісті.

– Жүлделі орын алғаныма өте қуаныштымын. Жыл сайын қатысамын, бірақ алғаш рет үлкен сыйлық ұтып отырмын.

– Бұл маусымда сен үшін «жыл жаңалығы» атанған ойыншы кім?

– Глеб Макридов. Сондай-ақ «Шахтерден» Найман Сатенов, «Қайраттан» Абылай Төлеухан өте жақсы маусым өткізді.

– Осындай нәтиже көрсетуге көмектескен қандай да бір лайфхактарың болды ма?

– Құрамаға қосқан жігіттердің қалай ойнайтынын жақсы білдім. Кімнен не күтуге болатынын сезетінмін.

– Матчтарды да қарадың ба, әлде тек статистикаға сүйендің бе?

– Иә, матчтарды көрдім, әсіресе «Шахтердің» ойындарын. Кейде басқа командалардың да ойындарын қарап жүрдім. Бірақ статистиканы да бақылап отырдым.

– PlayStation 5 ұтып алдың. Бұл консольдегі ең жақсы көретін ойының бар ма?

– Иә, EA FC. Онда «Барселонамен» ойнағым келеді.

– Fantasy QJ League-ға келесі жылы да қатысасың ба? Жаңа маусымға қандай тілектерің бар?

– Әрине, қатысамын. Енді бірінші орынды алғым келеді. Ал тілектерім – 2026 жылғы әлем чемпионаты бойынша арнайы фэнтези-турнир болса екен.

– Мундиальда кімге жанкүйер боласың?

– Испанияға. Бірақ Португалия чемпион атанса да керемет болар еді.