Fantasy QJ League: 7-турдан кейінгі үздік бес перформанс

Fantasy QJ League ойынында өз құрамына осы ойыншыларды қосқан қатысушылар үшін бұл нағыз табысқа айналды – бірден үш футболшы әсерлі перформанстарымен мол ұпай жинады. Осыған орай, өткен жеті тур ішіндегі фэнтези-лига тұрғысынан ең нәтижелі бес ойыншыны ұсынамыз.

Мақсат Абраев, «Астана» – 25 ұпай

Қашан: 7-тур, «Қайсарға» қарсы матч (10:0)

Маусым айындағы үзілістің соңында Мақсат Абраев Лиганың кибертурнирінде жеңіске жетіп, өткен жылғы жеңілісі үшін реванш алған еді. Бұл жолы шабуылшы виртуалды кеңістікте бәсекелескен фэнтези ойыншыларын да қуантты – қызылордалықтарға қарсы кездесуде ол покер (4 гол), екі нәтижелі пас және он сәтті дриблинг жасап, Fantasy QJ League ойынында 25 ұпай жинады.

Айта кетсек, алдыңғы алты турдың барлығында Әбраев бар болғаны 28 ұпай жинаған. Енді Мақсат осы әсерлі қарқынын сақтап қала ала ма – алдағы турлар көрсетеді.

Найман Сәтенов, «Шахтер» – 23 ұпай

Қашан: 7-тур, «Ертіске» қарсы матч (4:3)

Сәтенов маусым алдындағы үзіліске 1 гол мен 2 нәтижелі паспен жақсы көңіл-күйде кеткен еді. Алайда үзілістен кейінгі оның перформансы одан да әсерлі болды.

Жеңісті покер – пенальтиден соғылса да, покер болып қала береді. Найманға сенім артқан фэнтези ойыншылары бұл жолы 23 ұпайға ие болды: 20 ұпай – голдар үшін, 4 – толық ойын уақыты үшін, оған қоса 10 рет допты іліп әкетіп, тартып алды. Мұқият оқырман 1 ұпай жетіспейтінін байқаса керек – оған себепші болған ескерту қағазы (сары карточка).

Руслан Рахметов, «Ертіс» – 21 ұпай

Қашан: 1-тур, «Ақтөбеге» қарсы матч (7:2)

Өткен уикенд Рахметов үшін сәтсіз аяқталған матчқа қарамастан (жеңіліс «Шахтерден») табысты өтті – дубль мен 12 ұпай, бұл алдыңғы үш турдың жиынтық нәтижесінен де көп.

Алайда Русланның ең жарқын сәті – маусымның ашылуында болған. Сол ойында ол хет-трик жасап, екі нәтижелі пас беріп, алты рет қарсыласын алдап өтті. Ойыннан алған үш ұпайлық айыппұл (сары қағаз бен жіберілген пенальти үшін) бұл тізімге кіруіне кедергі бола алмады.

Руслан Валихан, «Астана» – 20 ұпай

Қашан: 7-тур, «Қайсарға» қарсы матч (10:0)

Руслан үшін (және оны өз құрамына қосқан фэнтези ойыншылары үшін) қызылордалықтармен өткен матч нағыз жұлдызды сәтке айналды. Үш гол, бір ассист және бес сәтті дриблинг – Валиханға үздік көрсеткіштер қатарына енуге жеткілікті болды.

Бұған дейін «Астана» ойыншысы фэнтези-лигада бір матчта максимум алты ұпай ғана жинаған еді. Енді Русланнан не күтеміз? Уақыт көрсетеді.

Абылай Төлеухан, «Қайрат» – 18 ұпай

Қашан: 7-тур, «Ордабасыға» қарсы матч (8:3)

Фэнтези-лигада жеті турдың қорытындысы бойынша 84 ұпаймен үздік ойыншылар рейтингінде көш бастап тұрғанымен, бүгінгі тізімде Абылай тек бесінші орында – ол бір матчта жарқ еткеннен гөрі, тұрақты нәтиже көрсетуді жөн көреді.

«Ордабасыға» қарсы ойында ол хет-трик жасап, алты сәтті дриблингпен көзге түсті – бұл оның Fantasy QJ League аясындағы жеке рекорды. Айта кетейік, жеті турдың ішінде Абылай небәрі бір-ақ рет 11 ұпайдан төмен нәтиже көрсетті. Сондықтан алдағы уикендке құрам жасақтап жатқан ойыншыларға ойланатын жайт бар.


Жетінші турдағы үздік құрам авторына рекордтық 143 ұпай әкелді. Бұл нәтижеге жетуге ерекше үлес қосқан шешім – Мақсат Абраевты капитан ету. Еске сала кетейік, капитандық байлам ойыншының жинаған ұпайын екі еселейді.

Айта кету керек, әр тур қорытындысы бойынша ең көп ұпай жинаған қатысушылар Лиганың бағалы сыйлықтарымен марапатталады. Маусым жеңімпазы iPhone 15 смартфонына ие болады, ал екінші және үшінші орын алғандар тиісінше PlayStation 5 Digital Edition және Xbox Series X жүлделеріне қол жеткізеді.

Fantasy QJ League ережелерімен төмендегі сілтеме арқылы танысуға болады.