«Тобылдың» алғашқы жеңісі және Толендінің кезекті покері: Freedom QJ League 5-турынан не білу керек

Жеңілмеген командалар саны азайды

«Шахтер» өз алаңында жанкүйерлерінің қолдауына қарамастан, «Қайраттан» ұпай тартып ала алмады – «сары-қаралар» үш матчтың үшеуінде де жеңіске жетті, ал негізгі турнирде қарсыластарын 7:1 есебімен тас-талқан етті. Гол авторлары әртүрлі футболшылар болды, ал «Шахтер» сапынан жалғыз голды Нурхан Қағазбаев соқты. Глеб Макридов та мергендік танытуға жақын болды, бірақ қақпашы Данила Буч оның 11 метрлік соққысын қайтарды.

Осылайша, U-18 турнирінде бес турдан кейін жеңіліс көрмеген үш-ақ команда қалды: «Қайраттан» бөлек, бұл тізімде «Ордабасы» және «Жас Қыран» бар. Айтпақшы, соңғылары осы демалыста «Атырауға» ұтылып қалуы мүмкін еді, бірақ 88-минутта Мансур Картамысовтың голы жағдайды құтқарып қалды – 2:2.

«Тобылдың» алғашқы жеңісі – U-17 турнирінде

Биылғы маусым Қостанай үшін сәтті басталды деп айту қиын – өткен турға дейін «Тобыл» үш турнирдің бәрінде не жеңіліп, не тең ойнап келген. Алайда, бесінші турда U-17 командасының жолы болды. Ілияс Бағытжанның «Тараз» қақпасына соққан голы командаға минималды жеңіс сыйлап, алғашқы ұпайларын алып келді – бұған дейінгі төрт ойынның бәрі жеңіліспен аяқталған еді.

Қазір «Тобыл» 2009 турнирлік кестеде 11-орында тұр – олардың астында екі рет тең түсіп, үш рет жеңілген «Қайсар» орналасқан.

Қостанайлықтар негізгі турнирде де жеңіске жетуге жақын еді – 87-минутта олар 2:1 есебімен алда келе жатқан. Алайда келесі шабуылда Ілияс Абдрахидың дәл соққысы «Таразды» құтқарып, Азизжон Бердиевтің автоголынан кейін тең есепті алып келді.

Төленді үстемдігін жалғастыруда

U-16 турнирінің алғашқы турында «Атырау» қақпасына төрт гол соққан «Астана» жартылай қорғаушысы, 14 жастағы Ануар Төленді бұл әсерлі нәтижені қайта қайталады – оның жаңа покері елордалық клубтың «Каспийді» 7:1 есебімен жеңуіне көмектесті.

Төленді – биылғы Freedom QJ League маусымында покер жасаған жалғыз футболшы. Қазір оның еншісінде 5 турда 11 гол бар – бұл көрсеткіш келесі екі сұрмергеннің жалпы гол санынан да көп. Қарсыластарына бұл алшақтықты қысқарту үшін едәуір тер төгуге тура келеді.

Испановтың жеке шеберлігі

«Астана» 2009 алғашқы таймда «Каспий» қақпасына гол соға алмады. Сол кезде бас бапкер Қайрат Тоқсанбаев екінші таймда алаңға Арсен Испановты шығарды – шабуылшы екі гол соғып, матчтағы жалғыз нәтижелі ойыншы атанды.

Бұл – Испановтың маусымдағы алғашқы голдары. Соңғы төрт матчта ол тұрақты түрде тек 45 минут қана алаңға шыққан болатын, бірақ бұл тактика тек бесінші турда нәтижесін берді.

Турдың ең нәтижелі матчтар

Freedom QJ League: «Шахтер» – «Қайрат» (1:7)

Freedom QJ League U-17: «Жас Қыран» – «Атырау» (6:0)

Freedom QJ League U-16: «Астана» – «Каспий» (7:1)