Freedom QJ League медиа-маркетингтік чемпионаты: пилоттық маусымның қорытындылары

Жобаның басты мақсаты – мамандарды жүйелі, креативті және сапалы жұмысқа ынталандыру. Дәл осындай тәсіл жекелеген клубтар мен олардың тәрбиеленушілерінің, сондай-ақ Лиганың жалпы танымалдылығын айтарлықтай арттыра алады.

Чемпионат сәуір мен қазан айлары аралығында өтіп, екі бағытқа бөлінді: медиа және маркетинг. Қатысушылар контенттік жобалардан бастап матчтарды безендіру, жанкүйерлермен өзара әрекет, аудитория өсімі мен тартылуын талдау сияқты түрлі тапсырмалар үшін ұпай жинады.

Маусым алты тең кезеңге бөлініп, әр кезеңнің қорытындысы бойынша аралық рейтинг жасалып отырды. Бұл формат чемпионатқа деген қызығушылықты жыл бойы сақтауға мүмкіндік берді.

Медиа-трек аясында клубтар Instagram желісінде 13 мыңнан астам жазба мен сторис, TikTok-та 500-ден астам бейнеролик және клуб сайттарында 200-ден астам жаңалық жариялады. Сонымен қатар Лигадағы өңірлік командалардың жетістіктері туралы бұқаралық ақпарат құралдарында шамамен 70 материал жарық көрді.

Маркетингтік бағытқа келсек, чемпионат барысында Freedom QJ League қатысушы клубтары көптеген ірі және жергілікті серіктестерді тартып, олармен нәтижелі жұмыс жүргізе алды.

Сондай-ақ бірқатар футбол орталықтары Лига ұйымдастырған медиакампаниялар, акциялар мен челлендждерге белсенді қатысып, әлеуметтік жобаларға, жастармен жұмысқа және трибуналардағы жанкүйерлер санының айтарлықтай артуына үлес қосты.

Маркетинг бағыты бойынша үздік клуб атанған – «Тараз» (1 468 ұпай). Одан кейін «Ордабасы» (1 163 ұпай) мен «Тобыл» (820 ұпай) орналасты. QJL Awards салтанатты рәсімінде оңтүстікқазақстандық команда Сейілда Байшақов атындағы жүлдемен марапатталды.



Медиа-тректің жеңімпаздары және Диас Омаров атындағы сыйлықтың иегерлері – «Атырау» футбол орталығының мамандары (2 809 ұпай). Екінші және үшінші орындарды тиісінше «Ордабасы» (2 790) мен «Оңтүстік» (2 377) иеленді.

Жалпы ұпай саны бойынша көшбасшыны да ерекше атап өткен жөн. «Ордабасы» екі бағытта да тұрақты әрі сапалы жұмыс көрсетті. Өткен маусымда клуб жасөспірімдер командаларымен жұмыс істеу үшін бірнеше жаңа серіктесті тартты, сондай-ақ Лигамен бірлескен барлық жобаларға, соның ішінде УЕФА Жасөспірімдер лигасының матчын өткізуге толық көлемде атсалысты.

Лиганың алғашқы екі маусымында үздік медиа-қызмет пен үздік маркетинг бөлімі иегерлері дауыс беру арқылы анықталған болатын.

Чемпионат форматы қатысушыларды бұл бағыттарды дамытуға ынталандырып қана қоймай, бүкіл маусым бойындағы нәтижелерді объективті бағалауға мүмкіндік беретін құрал ретінде қызмет етеді. Сондықтан бұл бастама алдағы маусымда да жалғасын табады.

Еске салайық, бұған дейін Сейілда Байшақов атындағы сыйлықты «Тараз» бен «Тобыл» иеленсе, Диас Омаров атындағы жүлде «Ақсу» мен «Астана» медиа-қызметтеріне бұйырған.