Freedom QJ League QJL All Star командасының құрамы туралы мәлімдемесі

2025 жылдың шілде айында Лига «А» біріншілігіне қатысатын барлық клубтарға QJL All Star командасының кеңейтілген тізіміндегі кандидаттар туралы ресми хат жолданды. Бұл команда мадридтік «Атлетико» жастар командасына қарсы матчқа дайындалу және қатысу үшін жасақталды. Лига өз тарапынан, клубтардың ойыншыларды команданың қарауына жіберуге келісімі болған жағдайда, футболшыларды сақтандыруға және жиын немесе матч кезінде жарақат алған жағдайда олардың қалпына келуіне жұмсалатын барлық шығынды өз мойнына алуға дайын екендігін кепілдеді. Ойыншылардың соңғы тізімі шілде–тамыз айларындағы көрсеткіштеріне қарай жасақталуы тиіс еді. Атап айтқанда, QJL All Star кеңейтілген тізіміне «Қайрат» ФК футболшылары Төлеухан А., Қалиқұлов А., Мұсайыпов А., Буч Д., Смақов А. енгізілген болатын.

Лигаға қатысатын барлық клубтар, «Қайрат» ФК-дан басқа, өз ойыншыларын әлемдік футбол алыбының академиясымен өтетін дәстүрлі шараға және матчқа жіберуге келісім берді. «Қайрат» ФК тарапынан клубтың бас директоры А. Есимов қол қойған футболшыларды беруден бас тарту туралы хат келіп түсті. Бас тарту себебі ретінде аталған ойыншылардың матчқа дайындық кезеңінде «Қайрат» ФК-ның жаттығу процесіне және Бірінші Лига ойындарына қатысатыны айтылды. Сонымен қатар, «Қайрат» ФК Лигада «құрама» командаларға ойыншылар шақыруға қандай да бір құқықтық негіздің жоқтығын атап өтті.

Аталған жағдайдан басқа, команданың соңғы құрамы Лиганың спорттық-аналитикалық бөлімі және QJL All Star командасының жаттықтыру штабы тарапынан тек қана спорттық принципке сүйене отырып жасақталды. Freedom QJ League «Қайрат» ФК басшылығының шешімін құрметтейді және 23 тамыз күні Алматыдағы «Хан Тәңірі» стадионында өтетін QJL All Star – «Атлетико» матчына дайындықты жалғастырады.