Freedom QJ League «Ордабасыға» УЕФА Жасөспірімдер лигасына қатысу үшін қаржылай қолдау көрсетеді

Естеріңізге сала кетейік, УЕФА Жасөспірімдер лигасы – Чемпиондар лигасына қатысатын клубтардың тәрбиеленушілері мен ұлттық жасөспірімдер чемпионаттарының U18 жас санатындағы жеңімпаздары бақ сынайтын халықаралық турнир.

Өткен маусымдағы Freedom QJ League жеңімпазы – алматылық «Қайрат» – негізгі командасының Чемпиондар лигасының жалпы кезеңіне шығуына байланысты турнирде орын алғандықтан, Ұлттық чемпиондар жолындағы квота күміс жүлдегер – шымкенттік «Ордабасыға» берілді.

Қаржылай қолдау бағдарламасының шарттарына сәйкес, УЕФА Жасөспірімдер лигасының Ұлттық чемпиондар жолына қатысушы клуб бірінші раунд алдында Freedom QJ League тарапынан 12,5 миллион теңге алады. Бұл қаражатты турнир аясында мына мақсаттарға жұмсай алады:

1) Сапалы логистика мен сапардағы орналастыруды жақсарту.

2) Өз алаңындағы ойындарды ұйымдастыру.

3) Команда қызметкерлеріне мотивациялық сыйақылар төлеу.

Әрбір келесі раунд үшін де осындай сома төленетін болады. Ұлттық чемпиондар жолында сегіз кезең бар: осылайша клуб жалпы көлемде 100 миллион теңгеге дейін қаражат таба алады.

УЕФА клубтарға ұшақ билеттері мен қонақүй шығындарының бір бөлігін өтегенімен, бұл төлемдердің мөлшері шектеулі әрі нақты шығындарды толық өтемейді. Сонымен қатар, өтемақы өз алаңындағы ойындарды ұйымдастыру шығындарын қамтымайды.

Freedom QJ League бастамасы команданың бар назарын футболға аударып, сапар ойындарын жоспарлау кезінде ойыншылар мен жаттықтырушылар штабына ең қолайлы жағдайды таңдауға, сондай-ақ жанкүйерлерге қызықты маркетингтік белсенділіктер ұйымдастыруға мүмкіндік береді. Сәтті өнер көрсеткен жағдайда команда лайықты сыйақыға ие болады.

Егер Лига бөлген қаражат пен УЕФА өтемақылары турнир шығындарын толық жапса, клуб өз қаржысын айтарлықтай үнемдеп, іс жүзінде табыс таба алады: босап қалған баптардан да, өз алаңындағы ойындарға билет сатудан түскен кірістер есебінен де.

«Ордабасының» турнирдегі алғашқы қарсыласы – Беларусьтің минскілік «Динамосы». Ойындар 26 және 30 қыркүйекте өтеді.

QJ League жеңімпаз клубтарға ұсынылған ынталандыру жүйесінен бас тарту құқығын қалдырады.