Голдар нөсері және «Каспийдің» өкінішті сериясы: Freedom QJ League 3-туры қалай өтті

Шымкенттегі екі автогол және үш пенальти

Шымкентте өткен «Ордабасы» мен ҚФФ Академиясы арасындағы матч ерекше сценариймен өрбіді. Алаң иелері бірден бес голдың авторы атанды, алайда олардың екеуін өз қақпасына соғып алды.

2-минутта Эмирхан Курбанов автоголмен көзге түсті, бірақ алаң иелері көп ұзамай бұл қателікті түзетті — есепті Дияр Рахимжанов теңестірді.

Дегенмен бірінші таймда жанкүйерлерді тағы бірнеше ерекше гол күтіп тұрды. 21-минутта Ануар Төленді пенальтиді сәтті орындап, қонақтарды қайтадан алға шығарды. Кейін «Ордабасы» шабуылшысы Әділбек Турдах таразы басын теңестірді, алайда бірнеше минуттан соң оның командаласы Талант Қуаныш екінші автоголды соқты.

Үзілістен кейін «Ордабасы» да пенальти тебу құқығына ие болды, оны Дияр Рахимжанов сәтті іске асырды. Бірақ жеңісті бәрібір ҚФФ Академиясы тойлады: 71-минутта матчтың соңғы голын — тағы да 11 метрлік белгіден — Платон Шипицын соқты. Алаң иелері 3:4 есебімен жеңілді.

«Қайраттың» мінсіз жүрісі

Алматылықтар «Ақтөбені» 6:0 есебімен ойсырата жеңді. Алғашқы голды Сұлтанәлі Әбдуәлі соқты, кейін Абылай Төлеухан пенальтиден көзге түсті, ал Дәулет Орынбасар мен Әлихан Әбді дубльден жасады.

Айта кетерлігі, бірінші таймның ортасында қонақтар алаңда бір ойыншыға кем қалды — 21-минутта Аян Аманжұлов дөрекі ойыны үшін екінші сары қағаз алды.

Үш турдан кейін «Қайраттың» статистикасы мінсіз көрінеді: үш жеңіс, 22 соғылған гол және бірде-бір жіберілген доп жоқ.

«Тараздың» алғашқы жеңісі

«Тараз» өз алаңында «Ертісті» сенімді түрде жеңді — матч 4:2 есебімен аяқталды. Оңтүстік командасының сапында Билял Садықов, Алан Ерболұлы, Расул Нұрманбай және Мұхаммет Шукуралиев гол соқты. Ерболұлы мен Нұрманбай бір-бір нәтижелі пастан да жазды.

85-минутқа дейін алаң иелері 4:0 есебімен ірі басымдыққа ие болды, алайда кейін «Ертістің» статистикасын Гапур Мержоев жақсартты — ол алдымен ойыннан гол соғып, кейін пенальтиді сәтті орындады. Бұл ретте шабуылшы алаңға тек екінші таймда шыққан еді.

«Ертіс» турнирлік кестенің соңғы орнында қалып отыр және «Каспиймен» бірге маусымда әлі жеңіске жетпеген екі команданың бірі болып тұр.

Ақтаудағы «Тобылдың» табысы

«Каспий» үшінші тур қатарынан 1:2 есебімен өкінішті жеңіліске ұшырады. Бұл жолы ақтаулықтардың қарсыласы «Тобыл» болды, ал кездесудің тағдыры бірінші таймда-ақ шешілді. 9-минутта қонақтар капитаны Ислам Жантасов есеп ашты, ал үзіліске аз уақыт қалғанда Наби Таласбек көзге түсті. Екі голда да нәтижелі пасты Назар Захарченко берді.

Белсенді шабуыл әрекеттеріне қарамастан, алаң иелері тек бір допты ғана қайтара алды — 77-минутта Ануар Ұзақбай Әлихан Жұмабайдың пасынан кейін гол соқты.

Айта кетерлігі, Ұзақбай бірінші турда «Астанаға» гол соққан еді, ал Әлихан Жұмабай екінші ойын уикендінде «Ақтөбе» қақпасына доп енгізді. Бірақ бұл байланыстың нәтижелілігіне қарамастан, «Каспий» әзірге ұпай жинай алмай келеді.

Акимовтың дублі «Шахтерге» жеңіс әкелді

Қарағандыда «Шахтер» «Астананы» 2:0 есебімен жеңді. Екі голды да екінші таймда жартылай қорғаушы Расул Акимов соқты — алдымен ол Жәнібек Жайлаубектің пасынан кейін Тамерлан Жанабергенов қорғаған қақпаны дәл көздеді, кейін пенальтиді сәтті орындады.

«Астана» да белсенді шабуылдады, бірақ қонақтарға қақпаға бағытталған 6 соққы да, 3.1 xG көрсеткіші де гол соғуға көмектеспеді. «Каспийге» қарсы қиын жеңістен кейін елордалық клуб екі матч қатарынан жеңілді — ал келесі турда сәтсіз сериясын тоқтатқан «Таразбен» кездеседі.

Қызылордадағы он гол

«Жас Қыран» тағы бір голға бай матч өткізді. Алматылықтар Қызылордада «Қайсарды» 7:3 есебімен жеңді. Қонақтардың үш голы «қасқырлар» алаңда бір ойыншыға кем қалғаннан кейін соғылды — 71-минутта Біржан Ертай екінші сары қағаз алды.

Ең көп нәтижелі әрекетті Сергей Шарунов пен Алан Луканин тіркеді: Шарунов дубль жасап, бір нәтижелі пас берді, ал Луканин бір гол соғып, екі ассист жасады. Матчтың басында Луканин пенальти тебуге де мүмкіндік алған, бірақ доп бағанаға тиді.

«Қайсар» сапында Мейіржан Мирамбеков пен Мәди Жеңісұлын атап өтуге болады: біріншісі дубль жасады, екіншісі «гол+пас» жүйесі бойынша 1+1 жинады.

Осылайша турнирлік кестеде көшбасшылар триумвираты сақталды: «Қайрат», «Жас Қыран» және «Шахтер» алғашқы үш орынды бөлісіп тұр, олардың әрқайсысында мүмкін болған тоғыз ұпайдың тоғызы бар.

3-турдан кейінгі үздік сұрмерген: Дәулет Орынбасар, «Қайрат» — 5 гол.

3-турдан кейінгі үздік ассистент: Абылай Төлеухан, «Қайрат» — 3 нәтижелі пас.