Freedom QJ League B турнирінің екінші турындағы матчтар қалай өткенін назарларыңызға ұсынамыз.
«Оңтүстіктің» қиын жеңісі
Freedom QJ League B-нің қазіргі чемпионы алғашқы турдағы сәтсіздіктен кейін екінші турда алғашқы ұпайларын еншіледі — өз алаңында «Қызылжарды» 3:2 есебімен жеңді. Алайда шымкенттік командаға есепте қуып жетуге тура келді: 26-минутта қонақтардың шабуылшысы Алихан Серікбай есеп ашты.
Кейін Асилбек Фахриддинов пенальтиден таразы басын теңестірсе, үзілістен соң Данил Пак «Оңтүстікті» алға шығарды. Бірнеше минуттан кейін алаң иелерінің басымдығы Арлан Баяхметтің автоголынан кейін арта түсті.
Соған қарамастан, матч соңында «Қызылжар» бір гол қайтарып үлгерді — Егор Лавренко қорытынды есепті белгіледі. Бұған дейін «Оңтүстік» бір ойыншыға кем қалған болатын: қорғаушы Аршат Әлібек қызыл қағаз алды.
Атыраудағы екі қызыл қағаз
«Атырау» өз алаңында «Жетісуды» сенімді түрде 3:1 есебімен жеңді. 26-минутта Аян Ғарипулла пенальтиден есеп ашса, үзілістен кейін Нұрбек Амангелді «мұнайшылардың» басымдығын арттырды.
75-минутта қонақтардың шабуылшысы Алихан Туманбаев бір гол соғып, интриганы қайтарғандай болды. Алайда камбэкке жол болмады. Бірнеше минуттан кейін «Жетісудың» екі ойыншысы — қорғаушы Емірхан Кольбаев пен қақпашы Глеб Осипов жанжал салдарынан алаңнан қуылды.
Қосымша минуттарда Алихан Серікқали соңғы нүктені қойды.
Тимур Дешко «Хан-Тәңіріне» жеңіс сыйлады
Алматыда өткен «Хан-Тәңірі» мен «Елімай» арасындағы матч голдарға бай болды — алаң иелері 4:3 есебімен жеңіске жетіп, тағдырлы сәт соңғы секундтарда шешілді.
9-минутта алаң иелерінің қорғаушысы Дінмұхамед Біржанұлы есеп ашты. Алайда көп ұзамай «Елімайдың» шабуылшысы Алинұр Карпишанов таразы басын теңестірді. Командалар үзіліске тең есеппен кеткенімен, екінші тайм басында қонақтар пенальтиді сәтті орындап, алға шықты — Вадим Сайбель мергендігімен көзге түсті.
Бірақ «Хан-Тәңірі» берілуді ойлаған жоқ. 57-минутта Тимур Дешко есепті теңестірді. Ал 70-минутта Дарын Уалхановтың голынан кейін «Елімай» қайтадан алға шықты.
Соған қарамастан, алаң иелері камбэк жасап үлгерді — барлығы Дешконың екі пенальтиінің арқасында. Алдымен ол 77-минутта есепті теңестірсе, кейін қосымша уақытта хет-трик авторы атану мүмкіндігін мүлт жібермеді.
Айта кетейік, бұл перформанс Тимур Дешкоға екінші турдан кейін чемпионаттың үздік сұрмергендер тізімінде жеке дара көш бастауға мүмкіндік берді — алғашқы турда ол бірде-бір гол соқпаған еді.
«Алтай» әлі жеңіссіз
«Жайық» өз алаңында «Алтайды» 2:0 есебімен жеңді. Гол авторлары — Ілияс Бекмұханов (пенальтиден) пен Бейбарыс Серікқали.
Осылайша, «Қызылжармен» бірге «Алтай» биылғы маусымда әлі ұпай жинай алмаған екі команданың бірі болып отыр. Өткен турда өскемендік ұжым «Оқжетпеске» минималды есеппен жол берген еді.
«Астана Аренадағы» 1:0
«Жеңіс» пен «Оқжетпес» арасындағы матч елорданың басты стадионы — «Астана Аренада» өтті. Тартысты өткен кездесуде астаналық команда жеңісті жұлып алды — 77-минутта Альфараби Жеңістің пасынан кейін Андрей Беляев жеңіс голын соқты.
Екінші тур қорытындысы бойынша турнир кестесінің көшін дәл осы «Жеңіс» пен «Жайық» бастап тұр.
.webp)
