Іңкәр Уктаева: «Freedom QJ League – мүлде басқа деңгей»

Сұхбат барысында 16 жастағы қорғаушы өзі туралы айтып, өткен маусымнан алған әсерімен және алдағы жоспарларымен бөлісті.

— Мен осы Астанада дүниеге келдім, осында өстім. Тоғыз жасымда футболмен айналыса бастадым, ал он жасымда осы клубқа келдім.

— Футболға қалай келдің? Бұған дейін басқа спорт түрімен айналыстың ба?

— Иә, мен көркем гимнастикамен айналыстым. Бірақ футболға барғым келді, себебі інім сол жаққа барған. Ата-анам қарсы болған жоқ.

— Қалай қорғаушы атандың?

— Білмеймін, бастапқыда шабуылшы болдым. Жаттықтырушы мені қорғауға қойды — содан бері осы позициядамын. Маған осы рөл көбірек ұнады.

— Freedom QJ League сенің өміріңде нені өзгертті?

— Бұл лига маған әлдеқайда көп мүмкіндік берді. Менің ойымша, Freedom QJ League – мүлде басқа деңгей. Мысалы, төртінші турда біз Павлодарға бардық. Қонақүй өте ұнады, бәрі керемет болды. Өзімді нағыз кәсіби спортшыдай сезіндім.

— Өткен маусымдағы ең жарқын матчыңды аташы.

— Бірінші турдағы «Тобылға» қарсы ойын. Біз сол матчта жеңіске жеттік, мен аптаның үздік ойыншысы атандым.

— Еуропалық футболды, соның ішінде әйелдер футболын қарайсың ба?

— Сирек көремін. Кейде «Барселона» ойнаса қараймын. Бұл – менің сүйікті клубым. Ерлер командасындағы сүйікті ойыншым – Пау Кубарси, ал әйелдер құрамасында – Алексия Путельяс.

— Қазақстан футболындағы басты кумирің кім?

— Мүмкін, Педру Эужениу шығар.

— Алдағы маусымға қандай мақсат қоясың?

— Маусымның MVP ойыншысы атану және бірнеше рет аптаның үздік ойыншысы болу.

— Өзіңде нені жақсартқың келеді?

— Мүмкін, төзімділігімді арттыру керек шығар. Тәртіпті жақсарту. Жылдамдықты дамыту.

— Өткен маусымда «Қайратпен» тартысты ойындар болды. Келесі маусымдағы команданың амбициясы қандай?

— Алтын медаль – басты мақсатымыз. Биыл «Қайратты» жеңгіміз келеді. Оларға екі рет жеңілдік, «Ертіске» де ұтылдық. Бірақ биыл біз күштірек боламыз деп ойлаймын және оларды жеңеміз.