А Лигасының 18-туры мәресіне жетті. Флагмандық турнирдің қорытындысын шығарамыз.
«Қайрат» алғаш рет ұпай жоғалтты
Уикендтің басты оқиғасы Шымкентте болды: «Ордабасы» қазіргі чемпиондардан ұпай алды – 1:1. Бұл «сары-қаралардың» маусымдағы алғашқы тең ойыны әрі жалпы алғанда алғаш рет ұпай жоғалтуы. Бұған дейін алматылықтар 17 матчтың бәрінде жеңіске жеткен еді.
Есепті алматылықтар ашты – 6-минутта Дәулет Орынбасар мергендік танытты. Алайда үзілістен кейін алаң иелері жауап қайтарды: 63-минутта Әділбек Тұрдах маусымдағы 13-голын соғып, «Ордабасыға» маңызды бір ұпай әкелді.
«Қайраттың» «Шахтерден» басымдығы 13 ұпайдан 11 ұпайға дейін қысқарды – чемпиондық атақты мерзімінен бұрын қорғау кейінге қалды.
«Шахтер» аз құрамда жеңісті жұлып алды
Екінші орында келе жатқан «кеншілер» Қызылордадан үш ұпаймен оралды – «Қайсарды» 2:1 есебімен жеңді. 33-минутта Айбатолла Шұлақов есеп ашса, үзілістен кейін алаң иелерінің қорғаушысы Жалғас Сайлаубек таразы басын теңестірді.
Ойынның соңы өте тартысты өтті. 74-минутта «Шахтер» он ойыншымен қалды – Илья Гезик екінші сары қағазын алды. Соған қарамастан, 83-минутта қонақтар жеңіс голын соқты – алаңға қосалқы құрамнан шыққан Александр Яковлев көзге түсті. Ал қосылған уақытта қарағандылықтар тағы бір ойыншысынан айырылды – Данил Литвиненко тікелей қызыл қағаз алды.
«Қайсар» 15 ұпаймен оныншы орында келеді.
Ақтөбедегі сегіз гол
Турдың ең нәтижелі матчы «Ақтөбе» мен «Астана» арасында өтті – алаң иелері 6:2 есебімен жеңді.
Ойын барысына 30-минуттағы қызыл қағаз айтарлықтай әсер етті: есеп 1:0 болып тұрған кезде қонақтардың қақпашысы Тамерлан Жанабергенов алаңнан қуылды. Бір сағат бойы аз құрамда ойнаған елордалық команда тағы бес гол жіберіп алды.
«Ақтөбенің» алты голын алты түрлі ойыншы соқты: Аян Аманжұлов, Арман Ахмет, Ибрагим Қуатов, Әлімжан Тәженов, Бикжан Жанаев және Жандауа Серғазы. «Астана» сапынан Бекзат Әбен мен Санжар Сәдуақасов мергендік танытты.
Осы жеңістің арқасында «қызыл-ақтар» «Жас Қыранды» басып озып, төртінші орынға көтерілді. Дегенмен «Ақтөбе» кестенің жоғарғы бөлігіндегі доп айырмасы теріс жалғыз команда болып қалып отыр – 41 гол соғып, 42 доп жіберген. «Астана» тоғызыншы орында.
«Каспий» 1:3 есебінен қайтты
Алматыда өткен «Жас Қыран» мен «Каспий» матчы 3:3 есебімен аяқталды. Ойынның аяқталуына 20 минут қалғанда алаң иелері екі доп айырмасымен алда тұрған еді.
48-минутқа қарай алматылықтар Нұрдәулет Сәбит пен Нұрбол Нұрланның голдарының арқасында сенімді басымдыққа ие болды. 59-минутта Аян Құлжарас пенальтиден есеп айырмасын қысқартты, бірақ көп ұзамай Сәбит дубль жасап, есепті 3:1-ге жеткізді.
Соған қарамастан, матч соңында «Каспий» үш минут ішінде екі рет гол соқты: 77-минутта Жандаулет Дүйсенбаев, 80-минутта Әлішер Нұрманжанов көзге түсті. Алаң иелері жауап қайтара алмады.
Олег Трофимов командасы үшін бұл елеулі ұпай жоғалту болды – «Жас Қыран» бесінші орында келеді және үшінші орыннан жеті ұпайға қалып тұр. «Каспий» 14 ұпаймен 11-орында.
Қостанайдағы жүйкеге тиген концовка
«Тобыл» өз алаңында «Ертісті» 3:2 есебімен жеңді, дегенмен 71-минутқа қарай үш доп айырмасымен алда тұрған еді. Нәби Таласбек дубль жасаса, үшінші голды Роман Гаврилюк соқты.
Алайда павлодарлықтар матч соңын өте белсенді өткізді – бірнеше минуттың ішінде Тамерлан Шоқанов пен Мадияр Есен интриганы қайта оятты. Бірақ есепті теңестіру мүмкін болмады.
Жеңістің арқасында Олег Лотовтың шәкірттері 26 ұпай жинап, «Ордабасыны» қуып келе жатқан командалар қатарында қалды.
Қостанайлықтар келесі матчты Таласбексіз өткізеді: шабуылшы маусымдағы сегізінші сары қағазын алып, дисквалификацияланды.
ҚФФ Академиясы «Тараздан» басым түсті
Юрий Мархельдің шәкірттері өз алаңында сенімді жеңіске жетті – 4:1. 18-минутқа қарай алаң иелері Давид Заречный мен Нұрмұхамед Қамбардың голдарының арқасында 2:0 есебімен алда тұрды.
Бірінші таймның соңында қонақтар он ойыншымен қалды – Ремзи Али-Оглы екінші сары қағазын алды. 58-минутта «Тараз» Расул Нұрманбайдың голымен жауап берді, бірақ кейін тағы екі рет доп жіберіп алды: Мансұр Болат пен Асхат Дүтпаев көзге түсті.
ҚФФ Академиясы 23 ұпаймен жетінші орында келеді және төртінші орыннан үш ұпайға қалып тұр. «Тараз» сегізінші орында қалды.
Айта кетейік, 18-тур дисквалификацияларға да бай болды: келесі матчтарды түрлі себеппен бірден он футболшы өткізіп алады.
18-турдан кейінгі үздік сұрмерген: Дәулет Орынбасар («Қайрат», 20 гол).
18-турдан кейінгі үздік ассистент: Аян Аманжұлов («Ақтөбе», 9 нәтижелі пас).
