U-18 командаларының алдағы матчтарынан не күтуге болатынын талдаймыз.
«Ақтөбе» – «Астана»
Қарсыластар алғашқы кездесуін елордада өткізіп, жеңімпазды анықтай алмады (3:3). Оның үстіне «қызыл-ақтар» соңғы минуттарда есепті теңестіріп кетті. Енді олар өз алаңында бастаған істі соңына дейін жеткізуге мүмкіндік алады.
Командалардың арасын жеті ұпай мен төрт орын бөліп тұр: «Ақтөбе» 23 ұпаймен бесінші, ал «Астана» 16 ұпаймен тоғызыншы орында. Алайда екі команданың бір көрсеткіші бірдей: екеуі де тура 40 голдан жіберген, бұл тұрғыда тек «Қайсар» мен «Ертістің» жағдайы нашар. Айырмашылығы – алаң иелері жауап қайтара біледі: «Ақтөбеде» 35 гол, ал қонақтарда 22 гол.
Кездесудің басты тұлғасы – Аян Аманжұлов: «Ақтөбе» жартылай қорғаушысы «гол+пас» жүйесі бойынша 8+8 көрсеткішін жинап, турнирде нәтижелі пастар саны бойынша көш бастап тұр. «Астананың» да өз диспетчері бар – Амандық Хамидуллиннің еншісінде жеті ассист. Елорда командасы сырт алаңдағы сегіз матчта небәрі жеті гол соққанын ескерсек, көп нәрсе дәл алаң ортасында шешілуі мүмкін.
«Тобыл» – «Ертіс»
Қостанайда голды аса көп соқпайтын екі команда кездеседі – «Тобыл» (6-орын, 23 ұпай, 18 гол) және «Ертіс» (12-орын, 12 ұпай, 21 гол).
Ал қорғаныста айырмашылық айқын. Қостанайлықтар небәрі 19 гол жіберді – бұл «Қайрат» пен «Шахтерден» кейінгі турнирдегі үшінші көрсеткіш. Павлодарлықтарда жағдай керісінше: 52 гол жіберген және маусымда сырт алаңда бір-ақ рет жеңіске жеткен – өткен турда Астанада 3:2.
Командалардың Павлодардағы алғашқы кездесуі 0:0 есебімен аяқталған еді. Бұл жолы қалай болар екен?
Академия КФФ – «Тараз»
Турнир кестесіндегі тікелей көршілердің кездесуі: алаң иелерінде 20 ұпай және жетінші орын, қонақтарда 19 ұпай және сегізінші орын. Ұқсастық мұнымен бітпейді – екі команда да 25 гол соғып, 32 гол жіберген. Яғни турға доп айырмасы да бірдей болып келді.
Тараздағы алғашқы матч 1:1 есебімен аяқталды. Енді алаң артықшылығы Академия КФФ жағында және статистика мұның маңызды екенін көрсетеді: қонақтар сырт алаңда бір-ақ рет жеңген – Павлодарда 1:0.
«Жас Қыран» – «Каспий»
Алматылықтар 25 ұпаймен төртінші орынды сақтап тұр және «Ордабасыдан» жеті ұпайға қалып келеді. Алда бес тур қалғандықтан, қола жүлдеге таласуға мүмкіндік әлі бар, бірақ ол үшін ұпай жоғалтпау керек.
«Каспий» он бірінші орында және өте тұрақсыз өнер көрсетуде: үш жеңіс пен жалғыз тең ойынға қарсы 12 жеңіліс. Соған қарамастан, ақтаулықтар тосынсый жасай алады: сырт алаңдағы жалғыз жеңісі ірі есеппен тіркелді – Астанада 5:1.
Ақтауда өткен бірінші айналым матчында қонақтар 3:0 есебімен жеңіске жеткен. «Каспий» үшін басты қауіп – Алан Луканин, «Жас Қыран» сапында гол санын екі таңбалы көрсеткішке жеткізген жалғыз ойыншы (17 матчта 10 гол).
«Ордабасы» – «Қайрат»
Турдың және, мүмкін, бүкіл маусымның орталық матчы. «Қайрат» 18-турға мінсіз нәтижемен келіп отыр: 17 матчта 17 жеңіс, 76 соғылған және небәрі бес жіберілген гол, сондай-ақ 12 «құрғақ» матч.
Егер алматылықтар Шымкентте «Шахтердің» Қызылордада жинағанынан кем емес ұпай алса, мәреге төрт тур қалғанда чемпион атанады. Ал жеңіс кез келген жағдайда чемпиондықты кепілдендіреді.
Шымкенттіктер өз алаңында әзірге бір-ақ рет жеңілді – Академия КФФ командасына 3:4 есебімен. Алайда бірінші айналымда Алматыда қарсылас оларға мүмкіндік қалдырмаған еді – 3:0.
«Қайсар» – «Шахтер»
Бұл командалардың алғашқы кездесуі «кеншілердің» 8:0 есебімен ірі жеңісімен аяқталды. Бірақ Қызылордада мұндай нәтижені қайталау қиынырақ болады, оның себебі бар.
Өз алаңында «кеншілер» мінсіз: тоғыз матчта тоғыз жеңіс, доп айырмасы – 28:2. Ал сырт алаңда мүлде басқа көрініс – сегіз ойында небәрі екі жеңіс, бес тең ойын және маусымдағы жалғыз жеңіліс (1:3 «Қайраттан»). Қарағандыдан тыс жерде «Шахтер» ұпайды жиі жоғалтады және бұл – «Қайсар» үшін басты үміт.
Қызылордалықтардың Лигадағы қорғанысы ең нашар – 54 гол жіберген, – бірақ өз алаңында әлдеқайда жинақы көрінеді: үш жеңіс, оның ішінде «Тобылды» 1:0 және «Таразды» 2:1 есебімен ұтты. Сондай-ақ матчтың «Шахтер» үшін турнирлік маңызы бар екенін айта кетейік – «Ордабасыдан» басымдығы небәрі алты ұпай.
