Флагмандық турнирдегі кезекті ойын күндерінің қорытындысын шығарамыз.
«Қайрат» жеңісті сериясын он екі матчқа жеткізді
Алматылықтар Павлодарда 5:1 есебімен жеңіске жетіп, жүз пайыздық нәтижесін сақтап қалды – мүмкін болған 36 ұпайдың 36-сын жинады.
Дегенмен кездесу «сары-қаралар» үшін біршама қобалжулы басталды: 17-минутта «Ертістің» қорғаушысы Александр Шпиев алаң иелерін алға шығарды.
Алайда жауап көп күттірмеді – 29-минутта Дәулет Орынбасар есепті теңестірсе, үзіліс алдында Роман Черноморец «Қайратты» алға шығарды. Ірі есептің тағдыры матч соңында шешілді: 88-минутта Орынбасар пенальтиді сәтті орындап, екі минуттан кейін хет-трик жасады. Ал қосылған уақытта алаңға аз уақыт бұрын шыққан Алдияр Құсайын қорытынды есепті белгіледі.
Қақпаға бағытталған соққылар арақатынасы кездесудің барысын анық көрсетеді: «Қайратта» 36 мүмкіндік, «Ертісте» небәрі үш мүмкіндік болды. Оның ішінде қақпаға дәл тиген соққылар саны – 14:2, ал күтілетін голдар көрсеткіші – 6,7-ге 0,3. Соған қарамастан, есепті павлодарлықтар ашқанын еске салайық.
Енді 13 гол соққан Орынбасар «Шахтер» ойыншысы Расул Акимовты басып озып, сұрмергендер көшін бастады. «Ертіс» соңғы орында қалып отыр: 39 жіберілген гол – лигадағы ең нашар көрсеткіш. Оның 17-сін команда «Қайратпен» өткен екі кездесуде жіберді.
Елордадағы сенсация
Турдың басты тосынсыйы Air Arena-да өткен матчта тіркелді. «Астана» өз алаңында «Каспийді» қабылдап, 1:5 есебімен есе жіберді.
Ойынның бетбұрысты сәті үзіліске дейін болды: 42-минутта алаң иелерінің қорғаушысы Мансұр Алихан перспективалы шабуылды тоқтатқаны үшін екінші сары қағазын алды. Ал 43-минутта Рамазан Амангелдиев есеп ашты.
Екінші таймның барлығын елордалық команда бір ойыншыға кем өткізіп, тағы үш гол жіберіп алды. Аманияз Орынғалиев, Мағзұм Жоламан және тағы бір мәрте Амангелдиев мергендік танытты. 80-минутта «Астана» сапынан Хайдар Тоғымов бір голмен жауап берсе, «Каспий» қорғаушысы Рахат Жиенбаев қорытынды есепті белгіледі.
Амангелдиев үшін бұл екі гол маусымдағы алғашқы нәтижелі соққылары болды. Ақтау командасы маусымдағы ең ірі жеңісіне қол жеткізіп, алғаш рет сырт алаңда үш ұпай иеленді.
Тағы бір қызық дерек: «Каспий» мен «Қайрат» – турнирде әлі бірде-бір рет тең түспеген жалғыз командалар.
«Шахтер» қосылған уақытта құтылды
Қарағандылықтар Таразда ұпай жоғалтуға шақ қалды. 11-минутта Данияр Баймахан алаң иелерін алға шығарды. Бұл есеп екінші таймның қосылған уақытына дейін сақталды. Сол кезде Дамир Юсупбековтің соққысы «кеншілерге» 1:1 есебіндегі тең нәтижені алып келді. Жартылай қорғаушы үшін бұл маусымдағы алғашқы гол.
«Шахтер» 27 ұпаймен екінші орнын сақтап қалды, алайда «Қайраттан» тоғыз ұпайға қалып келеді. «Тараз» жеті тур қатарынан жеңіске жете алмай, тоғыз ұпаймен 11-орында тұр.
«Ордабасы» матч соңында «Ақтөбені» тізе бүктірді
Шымкенттік команда қатарынан төртінші жеңісіне жетіп, Ақтөбеден үш ұпаймен оралды – 1:2.
Кездесудің басы қонақтар үшін өте сәтсіз өрбіді: 26-минутта «Ордабасы» қорғаушысы Мұхит Абдулахмед допты өз қақпасына бағыттап алды. Алайда 28-минутта алаң иелері он ойыншымен қалды – Иван Ковтун дөрекі ойыны үшін екінші сары қағазын алды.
Сан басымдығы оңтүстік командаға ұзақ уақыт бойы нәтиже әкелмеді. Дегенмен 82-минутта Құдірет Ботабек есепті теңестірді. Ал матч соңында «Ордабасы» 11 метрлік айып добын орындауға мүмкіндік алып, оны Әділбек Тұрдах сәтті жүзеге асырды.
«Ордабасы» 23 ұпаймен үшінші орында нық тұр. «Ақтөбе» төрт жеңіс, төрт тең ойын және төрт жеңілістен тұратын ерекше көрсеткішпен алтыншы орында келеді.
Қақпаға бағытталған бір дәл соққы – үш ұпай
ҚФФ академиясы «Жас Қыранды» 1:0 есебімен жеңді. Жалғыз голды 70-минутта Артем Шалыгин соқты – бұл оның маусымдағы алғашқы голы.
Матч статистикасы таңғалдырады: алаң иелері 18 соққы жасап, оның бесеуін қақпаға дәл бағыттады. Қонақтар небәрі сегіз рет соққы жасап, соның біреуін ғана қақпаға дәл бағыттады. Жеңіске жету үшін сол бір соққы жеткілікті болды.
Үзілістен кейін ҚФФ академиясының қақпасына 14 жастағы Евгений Кравцов тұрды. Бұл оның флагмандық турнирдегі дебюттік кездесуі болды: екі сейв және гол жібермеген 45 минут.
«Жас Қыран» бес тур қатарынан жеңіске жете алмай, бесінші орынға түсті. ҚФФ академиясы 14 ұпаймен сегізінші орында тұр. «Астанада» да сонша ұпай бар, алайда елордалықтар өзара кездесудегі жеңісінің арқасында жоғары орналасқан.
«Тобылдың» минималды жеңісі
Қостанайда алаң иелері «Қайсарды» 2:1 есебімен жеңді.
11-минутта капитан Ислам Жантасов есеп ашты. Бірінші таймның соңында «қасқырлардың» шабуылшысы Мәди Жеңісұлы таразы басын теңестірді. Алайда 59-минутта Назар Захарченко жеңіс голын соқты.
«Қайсар» қақпаға дәл тиген соққылар саны бойынша «Тобылдан» басым болды – жетіге төрт, бірақ жеңілістен құтыла алмады.
«Тобыл» 18 ұпаймен төртінші орында келеді. Қостанайлықтардың шабуылы турнирдегі ең төмен көрсеткішке ие – бар болғаны 12 гол. Алайда командада «Қайрат» пен «Шахтерден» кейінгі үшінші үздік қорғаныс бар – 11 жіберілген гол.
12-турдан кейінгі үздік сұрмерген: Дәулет Орынбасар («Қайрат», 13 гол).
12-турдан кейінгі үздік ассистенттер: Әділбек Тұрдах («Ордабасы»), Аян Аманжұлов («Ақтөбе») және Амандық Хамидуллин («Астана») – 5 нәтижелі пастан.
.png)
.png)
