Негізгі ойыншылар мен өзара кездесулер: Freedom QJ League W-ның алғашқы турына дейін не білу керек

«Ертіс» – «Шахтер»

Павлодарлық футболшы қыздар былтыр 2008–2009 жылы туған қыздар арасындағы Қазақстан чемпионатында бесінші орын алған еді – ол кезде олар «Ақсу» командасының атынан ойнаған болатын. Ал «Шахтер» командасы оныншы болып мәреге жетті.

Өткен жылғы өзара кездесуде бүгінгі алаң иелері жеңіске жеткен – 3:1. Сол ойында «Ақсу» сапынан Елизавета Медведева мен Валерия Косарева гол соқты – екеуі де жаңа маусымда Павлодар намысын қорғайтын болады. «Шахтер» сапында жалғыз голды Саида Дюсембаева соққан – ол да команда құрамында қалды.

«Қайрат» – «Жетісу»

Былтыр «Қайрат» командасы Қазақстан чемпионатында екінші орын алса, Талдықорғанның «Жетісуы» 15-орында аяқтаған болатын.

«Сары-қаралардың» екі ойыншысы жеке марапатқа ие болды. Жания Махаш үздік жартылай қорғаушы деп танылса, Ангелина Кленова үздік шабуылшы атанды. Екеуі де жаңа маусымға тіркелген. Freedom QJ League-нің барлық жасөспірімдер турнирлерінде топ жарған алматылық команданың биылғы амбициясы да жоғары.

«Астана» – «Тобыл»

Астаналық команда былтырғы Қазақстан чемпионатында төртінші орын алды, ал «Тобыл» алтыншы орынға жайғасты. «Астананың» шабуылшысы Асыл Пазыл сол турнирдің үздік сұрмергені атанған – енді ол бұл жетістікті Freedom QJ League-де қайталауға тырысады.

Айтпақшы, дәл сол Пазыл өткен маусымдағы «Тобылға» қарсы ойында екі жауапсыз голдың бірін соққан. Екіншісін Зарэма Максот салған – ол да алдағы турда қайтадан қостанайлықтармен кездесуі мүмкін.

«Ордабасы» – «Ақтөбе»

Шымкенттік футболшы қыздар – 2008–2009 жылы туған қыздар арасындағы қазіргі Қазақстан чемпиондары.

Асель Жолболат былтырғы чемпионаттың үздік ойыншысы атанса, Зарина Хайтметова үздік қақпашы болып танылды. Екеуі де қазіргі таңда ересектер футболына ауысқан. Ал Freedom QJ League-де «Ордабасы» клубын жастау ойыншылар таныстырады.

«Ақтөбеге» келсек, олар өткен маусымда 11-орында аяқтаған. Сол маусымдағы «Ордабасыға» қарсы ойында 0:4 есебімен жеңілген болатын. Алайда ол ойында гол соққан футболшылардың ешқайсысы алдағы маусымда өтетін Freedom QJ League-ға тіркелмеген.