ҚФФ Академиясы көш бастап тұр, «Жеңіс» дебютанттар шайқасында жеңіске жетті: Freedom QJ League B 2-турының жарқын сәттері

ҚФФ Академиясы жеңісті жолын жалғастыруда

Маусым басталар алдында 2010 жылы туған ойыншылардан құралған ҚФФ Академиясы үлкен жастағы командалармен бәсекелесе алады деп ешкім ойламаған еді. Алайда дәл қазір дәл осы жағдай орын алып жатыр – турнирді «Алтайды» ірі есеппен жеңумен бастаған Стюарт Холлдың командасы өз жетістігін Жезқазғанда «Ұлытауды» жеңумен бекіте түсті. Гол авторлары: Платон Шипицин (20-минут) және Давид Заречный (63-минут, пенальтиден).

Енді ҚФФ Академиясы Freedom QJ League B турнирлік кестесінде жеке-дара көш бастап тұр. Екі тур бойы команда қақпасына бірде-бір гол жіберген жоқ.

Дебютанттар шайқасындағы жеңіс – «Жеңіс» командасында

Екінші турда Freedom QJ League екі дебютант клубы – «Хан-Тәңірі» мен «Жеңіс» өзара кездесті. Матч Алматыда өтті, алайда бұл алаң иелеріне көмектесе алмады – астаналық клуб голға толы кездесуде минималды жеңіске жетті. Қорытынды ысқырық шалынысымен таблода қонақтардың пайдасына 2:3 есебі тіркелді.

Айта кету керек, ойынның тағдырын шешкен сәт – 66-минутта «Хан-Тәңірі» қақпашысы Мұқағали Тамабектің алаңнан қуылуы болды. Ол кезде есеп 1:1 болатын. Оны алмастырған Мейіржан Әмірбек алдымен Рахат Ақтанның 11 метрлік айып добынан соққан голын қайтара алмады, кейіннен Әлинұр Майтановтың соққысынан да допты өткізіп алды. Матчтың соңғы секундтарында алаң иелері есеп айырмасын қысқартты – Мади Сәлімов гол соқты.

«Оқжетпес» – «Жетісу»: Қалымжановтың керемет қос голы және Дауттың автоголы

2-турдың ең нәтижелі ойыны Көкшетауда өткен «Оқжетпес» пен «Жетісу» арасындағы кездесу болды – алаң иелері 4:2 есебімен жеңіске жетті.

«Оқжетпестің» жеңісіндегі басты қаһарман – Тамирлан Қалымжанов болды. 16 жастағы жартылай қорғаушы 50- және 70-минуттарда дубль жасап қана қоймай, 56-минутта Дмитрий Колесниченкоға нәтижелі пас та шығарды. Екі ойында үш гол соққан Қалымжанов турнирдің сұрмергендер көшін бастап тұр.

Қызығы сол, Көкшетау командасының соңғы голы 80-минутта соғылды – Петр Попадюк пенальтиден мүлт кеткен жоқ.

Қонақтар тек 89-минутта ғана престиж голын соға алды. Ал қосымша уақыттың соңғы сәттерінде «Жетісу» есеп айырмасын тағы қысқартты – бұл жолы бұрыштамадан кейін допқа сәтсіз әсер еткен Таир Даут автогол авторы атанды.