Көптен күткен бастама: Freedom QJ League 1-турына шолу

«Қайрат» – «Қайсар»: «қасқырлар» тосынсый жасай ма?

Өткен жылы екі бірдей турнирде жеңіске жеткен алматылықтар бұл жолы U-17 және негізгі лигада соңғы орындарда болған қызылордалықтармен кездеседі.

Өткен маусымдағы үздік сұрмерген әрі ең құнды ойыншы Дәулет Орынбасар жаңа маусымға тіркелген. Сондай-ақ, қос чемпиондық құрамда көзге түскен Абылай Төлеухан да бар.

«Ертіс» – «Ақтөбе»: қайсысы басым болады?

Павлодарлықтар былтырғы U-17 додасын тоғызыншы орында аяқтаса, ақтөбеліктер үздік үштікке таласып, ақырында төртінші болды.

2008 жылғы буынның жеке кездесулерінде тепе-теңдік байқалады: «Ақтөбе» өз алаңында жеңіске жетсе, сырт алаңда ұтылып қалды. Үшінші кездесу қалай аяқталар екен?

«Каспий» – «Тараз»: гол соғылады ма?

2024 жылы қос ұжым U-17 турнирінің қорытынды кестесінде қатар орналасқан: Ақтаулықтар 24 ұпаймен жетінші болса, тараздықтар тек бір ұпай кем жинап, сегізінші болды. Алайда, екі команданың арасындағы кездесулер өте нәтижесіз өтті – екі ойында жалғыз ғана гол соғылған.

Бұл жолы жанкүйерлерге гол сыйлай ала ма? Көрерміз.

«Шахтер» – «Жас Қыран»: қарымта қайтару уақыты

Бұл да – өткен маусымда бір-біріне жақын аяқтаған екі команда арасындағы текетірес: U-17 турнирінде тиісінше алтыншы және бесінші орындар. Алайда «Шахтер» екі ойында да жеңілді – 2:3 және 0:3. Енді қарғандылықтар маусымды реваншпен бастауды көздейді.

«Астана» – «Атырау»: бәрі оңай емес

U-17 турнирінің басты фавориттерінің бірі болған елордалықтар бұл жолы соңғы орынға табан тіреген «Атыраумен» кездеседі.

Ұпай айырмашылығы 47 болғанымен, тікелей кездесулерде «мұнайшылар» оңайлықпен берілмеген – 2:3 және 1:3.

«Тобыл» – «Ордабасы»: болжап болмайтын матч

Өткен жылы U-17 турнирінің қола жүлдегері атанған «Ордабасы» алғашқы ойында «Тобылды» 4:0 есебімен жеңсе, соңғы турда жауап ретінде ұтылып қалды. Сондықтан бұл жолы не боларын болжау қиын.

Freedom QJ League 2025: бірге болатын уақыт қайта келді

Fantasy QJ League қайта оралады: басты жаңалықтар