Мақсат Абраев – чемпион! Freedom Media Cyber Cup 2025 қалай өтті?

Биыл Freedom Media Cyber Cup алғаш рет Астанада өтті. Алайда EA FC 25 ойыны бойынша алғашқы бәсекелер PlayStation 5 платформасында өткен демалыс күндерінен әлдеқайда ерте басталды – турнирге қатысу үшін ойыншылар алдымен өз клубтарының ішкі іріктеуінен өтуі керек болды. Іріктеу кезеңдері Freedom QJ League-тің премиум серіктесі – Changan Kazakhstan компаниясының аймақтық дилерлік орталықтарында ұйымдастырылды.

Іріктеу турнирлерінің нәтижесінде Лиганың 22 клубынан 22 футболшы анықталды. Олар Қазақстанның астанасына жиналып, кімнің мықты екенін анықтауға келді.

Сенбі күні өткен алдын ала кезең Астанадағы The Hood компьютерлік клубында ұйымдастырылды. Жеребе нәтижесінде қатысушылар төрт топқа бөлінді. Әр топтан плей-офф кезеңіне үздік екі ойыншы өтті. Осылайша, ширек финалға жолдама алған сегіз ойыншы анықталды: Алихан Әли («Оңтүстік»), Тимур Дешко («Хан-Тәңірі»), Досымжан Досетов («Каспий»), Тимур Титаренко («Ертіс»), Данияр Шарабадин («Қайсар»), Мақсат Абраев («Астана»), Нұрхад Нұрымов («Қайрат») және Мансұр Нұрлан («Алтай»).

Айта кету керек, B тобында Досымжан Досетов барлық қарсыласын жеңіп, топтан бірінші орынмен шықты. Ал екінші орынға бірден төрт ойыншы үміткер болды – Тимур Титаренко, Әмірхан Алиханов, Жәңгір Төлеген және Артём Шиманский 7 ұпайдан жинады. Ширек финал жолдамасының иегері тек қосымша көрсеткіш – соғылған және жіберілген голдардың айырмасы бойынша анықталды.

Осылайша, Лиганың ең мықты сегіз киберспортшысы Mega Silk Way сауда орталығындағы үлкен сахнада, жүздеген көрерменнің көз алдында трофей үшін күресті жалғастырды. Ойыншылардың клубтастары, туыстары мен жақындары, сондай-ақ кез келген жанкүйер Freedom Media платформасындағы тікелей эфир арқылы жарыстың барысын онлайн тамашалай алды – комментаторлар мен матч алдындағы студия да ұйымдастырылды.



Алғашқы ширек финалдық кездесуде Алихан Әли мен Тимур Титаренко тартысты да, нәтижелі ойын көрсетті. «Оңтүстіктің» шабуылшысы бір гол артық соғып, есепті 4:3-ке жеткізіп, келесі кезеңге жолдама алды.

Досымжан Досетов пен Тимур Дешко арасындағы кездесу де оңайға соққан жоқ – 3:2 есебімен «Хан-Тәңірінің» жартылай қорғаушысы жеңіске жетіп, үздік төрттікке жолдама алды.

Бұл уақытта Данияр Шарабадин Мансұр Нұрланды сенімді түрде жеңіп шықты – 5:1. Ал Мақсат Абраев Нұрхад Нұрымовқа бірде-бір гол соғуға мүмкіндік бермей, 4:0 есебімен айқын басымдық танытты.

Жартылай финалдағы ойындар да голдарға бай болды: Данияр Шарабадин Алихан Әлиді 5:3 есебімен жеңсе, Мақсат Абраев Тимур Дешкомен болған кездесуде 7:4 есебімен басым түсті.

Осылайша, финалға шыққан Данияр мен Мақсат былтырғы жартылай финалдағы өзара кездесуді қайталауға мүмкіндік алды – бұл жолы бәрі финалдық трофей үшін, әлдеқайда жоғары бағада өтті.

Айта кету керек, финалдық серияда екі ойыншы да алдын ала жоспарлағандай мадридтік «Реал» клубын таңдады.

Еске сала кетейік, алдын ала кезеңдегі жеребе нәтижесінде Данияр Шарабадин мен Мақсат Абраев бір топқа түскен еді – бұл екеуіне де плей-оффқа жолдама алуға кедергі болмады. Данияр топтық кезеңде айқын басымдық танытып, төрт ойында төрт жеңіске жетіп, ешқандай қиындықсыз ширек финалға өтті.

Ол кезде Данияр Мақсатты да жеңіп шыққан болатын. Алайда финалдық «Best of 3» форматындағы серияда Мақсат Абраев былтырғы жетістігін қайталап, Данияр Шарабадинді тағы да жеңе алды – 4:2, 2:0.

Осылайша, екінші талпынысында Мақсат Абраев көптен күткен трофейді басынан жоғары көтерді – марапатты оған Лига президенті Рохус Шох жеке өзі табыстады.

«Астана» командасындағы Мақсаттың әріптестері сахнаға жүгіріп шығып, бұл қуанышты сәтті онымен бірге атап өтті – барлығы Queen тобының «We Are the Champions» әні мен шашылған конфетти аясында өтті.



Freedom Media Cyber Cup тарихында алғаш рет турнирге тек Лига футболшылары ғана емес, кез келген ниет білдіруші қатыса алды. Ашық турнирдің жүлде қоры 1 миллион теңгені құрады, оның жартысы жеңімпазға табысталды.

Ашық турнирге қала тұрғындары мен қонақтарынан 128 қатысушы тіркелді. Олардың арасында кәсіби фиферлер де болды – солардың екеуі, Алишер (alish_back) Мұқанәлі мен Федор (Fenuma) Зенин финалға дейін жетті. Футболшылар арасындағы финалистер сияқты, олар да «патшалық клубты» – мадридтік «Реалды» таңдады. Нәтижесінде Федор 5:1 есебімен жеңіске жетіп, турнирдің чемпионы атанды.

Айта кету керек, ашық санатта алғашқы кибертурнирдің жеңімпазы – сол кезде «Ақсу» намысын қорғаған Ерназар Дюсеков те өз бағын сынап көрді. Ол ширек финалға дейін жетті.

Осы уақытта бітіру емтихандарына байланысты үзіліс те аяқталып келеді – жасөспірімдер футболы осы аптада қайта жалғасады.

Freedom Media сізге арнайы 3 айлық жазылымды небәрі 5 теңгеге ұсынады! QJ2025 промокодын қолданып, тіркеліңіз!