Жаңа арена, мыңдаған жанкүйер, ерекше атмосфера: Қызылордадағы футбол мерекесінің басты сәттері

Жаңа матчдэй – жаңа концепция

Әдеттегідей, бұл мереке де қысқа әрі мазмұнды ұранға негізделген ерекше концепциямен өтті.

Егер Лига тарихындағы алғашқы қыздар турнирінің ашылуы «Қыздар футболы – жаздан да жарқын» ұранымен өтсе, ал QJL All Star жобасының «Атлетикомен» байланысы «Where football meets the night» тіркесімен сипатталса, мыңыншы матч «Оңтүстік пен Солтүстік» айқасы ретінде өтті. Себебі Қызылорда Қостанайдан келген қонақтарды қабылдады.

Бұл идея афиша дизайнында да, матч алдындағы белсенділіктерде де көрініс тапты – фотозона, цифрлық селфи-айна және дәстүрлі кикер ойыны жанкүйерлерге ұсынылды.



Серіктестермен бірге

Қызылордадағы ауқымды футбол мерекесі серіктестердің қолдауымен жүзеге асты.

Арена кіреберісінде Лиганың премиум-серіктесі – «Астана Моторс» құрамына кіретін Changan Kazakhstan аймағы орналасты. Онда автокөлік көрмесі, ақпараттық нүкте, панна-футбол алаңы және фотобудка болды.



Мыңыншы матчта жеңіс голын соққан «Қайсар» жартылай қорғаушысы Ернар Парда Changan Kazakhstan және Astana Motors тарапынан арнайы сыйлық – iPhone 17 Pro алды. Марапатты Changan Kyzylorda дилерлік орталығының директоры Нұрсұлтан Пірім табыстады.

Сонымен қатар, ЮНИСЕФ ұйымының еріктілері де маңызды рөл атқарып, шара барысында көрермендер мен қызметкерлерге көмектесті.



Матч алдындағы студия және Рохус Шохқа торт

Матч алдында дәстүрлі студия өтті. Оның қонақтары – Қамқоршылық кеңесінің төрағасы Тимур Турлов пен Лига президенті Рохус Шох болды. Жүргізушілер – Темірлан Орынбаев пен Ернұр Дүйсенғазы.



Тимур Турлов: «Жаңа заманауи стадион, мыңыншы матч және басталуына бір сағат қалғанда трибуналар толып тұр. Көптеген жастар, балалар, күлімдеген жүздер – бұл біздің футболдағы жаңарудың айқын белгісі».

Рохус Шох: «Мыңыншы матчтың өткені – сенгісіз. Біз бұл жобаны бастағанда мұндай нәтижені елестету қиын еді. Бірақ ол күткеннен де асып түсті».

Сондай-ақ ол матчтың жаңа ашылған «Қайсар Аренада» өтуінің символикалық мәнін атап өтті.

Айта кетейік, 18 сәуір күні Рохус Шох 64 жасқа толып, матч барысында оған арнайы торт табысталды.



Алаңдағы шоу

Матчдэй бағдарламасы алаң ішіндегі шоуға да толы болды. Алғаш рет Қызылордада Freedom QJ League гимні тірі оркестрдің орындауында шырқалды. Сонымен қатар жаңа маусымға арналған промо-ролик көрсетілді.

Стадион безендірілуі де ерекше болды: софиттер, пиротехника, баннерлер мен тулар ерекше атмосфера қалыптастырды.



Үзілісте DARICORN өнер көрсетсе, матчтан кейін ARO өз хиттерін орындады.



Dance Cam форматы да жанкүйерлерге ерекше көңіл-күй сыйлады – олар экраннан өздерін көріп, стадионмен бірге биледі.

Жанкүйерлерге арналған лотерея

Матч соңында жанкүйерлер үшін жүлде ұтысы өтті. Үш бақытты көрермен PlayStation 5, iPad және AirPods Pro иегері атанды.

Қорытынды

Матчқа 7 725 көрермен жиналды. Олардың көпшілігі таңертеңнен бастап келіп, U-17 командасына да қолдау көрсетті.

Жанкүйерлер белсенді түрде қолдау білдіріп, ойын атмосферасын ерекше деңгейге көтерді. Әсіресе балалардың көп болуы бұл күннің маңызын арттырды.

Ойыннан кейін олар футболшылармен суретке түсіп, ұмытылмас әсер алды.

Лиганың медиа және маркетинг бөлімінің жетекшісі Антон Лысяк: «Бұл – нағыз шоу болды. Бірақ ең бастысы – жанкүйерлер мен ойыншылардың эмоциясы. Біз бәрін сол үшін жасаймыз», – деді.

2026 маусымы ресми түрде басталды. Алда – кибертурнир мен QJL All Star матчын қоса алғанда, көптеген ірі оқиғалар бар.