Жаңа буын: алдағы Freedom QJ League W маусымында кімдер ашылуы мүмкін?

Өткен маусымда көп ойын уақытына ие болмағанымен, берілген мүмкіндіктерді тиімді пайдалана білген жас футболшы қыздардың топтамасын ұсынамыз. Алдағы турнир олардың мансабындағы нағыз серпіліс болуы әбден мүмкін – сондықтан олармен алдын ала танысайық.

Жібек Марат («Астана»)

Өткен жылдың тамыз айында небәрі 14 жасқа толған елордалық клубтың жартылай қорғаушысы маусым барысында берілген 809 минутта жасы үлкен қарсыластарға қарсы өте әсерлі көрсеткіштер көрсете алды. Жібек 12 матчқа қатысып, 4 гол соғып, 6 нәтижелі пас берген.

Оның ең жарқын ойыны 5-турдағы «Ордабасыға» қарсы өткен үй матчында тіркелді. Екінші таймда 1:1 есебімен алаңға шыққан Жібек небәрі он минуттың ішінде алдымен Софья Рыбакқа нәтижелі пас беріп, кейін Әльзия Жамбылдың пасынан өзі гол соқты. Осылайша «Астана» сенімді жеңіске жетті. Алдағы маусымда Маратқа өзін көрсетуге көбірек мүмкіндік берілуі әбден мүмкін.

Айнель Сманова («Астана»)

Айнель де Жібектің құрдасы – ол да маусым соңында 14 жасқа толды. Қорғаушы ретінде бар болғаны 9 матчта 720 минут ойнағанына қарамастан, ол қыздар арасындағы турнирдің ең үздік ассистенттерінің біріне айналды – 9 нәтижелі пас, соның ішінде «Жетысуға» қарсы матчтағы ассистенттік «покер». Сол ойында Сманова өзі де голмен көзге түсті.

Айнельдің нәтижелі пастары «Астананың» соңғы турда күміс жүлдені жұлып алуына тікелей әсер етті. Еске салайық, елордалық команда «Ертісті» небәрі екі ұпайға ғана артта қалдырып, өз матчында «Шахтерді» минимал есеппен жеңді – сол төрт голдың екеуі Сманованың ассисттерінен соғылды.

Айжан Есіркепова («Ақтөбе»)

2011 жылы туған ойыншылардың тағы бір өкілі – «Ақтөбенің» шабуылшысы Айжан. Өткен маусымда ол 10 матчта бар болғаны 498 минут ойнады, алайда осы уақыт ішінде 5 гол соғып, 1 нәтижелі пас берді.

Есіркепованың маусымдағы ең маңызды ойыны 13-турға тұспа-тұс келді. Дәл Айжанның арқасында «Шахтерге» қарсы матчта (2:1) жеңіске жетті: 21-минутта ол Азиза Талапқа дәл пас берсе, бірінші таймның соңында өзі де гол соқты.

Алия Самат («Ақтөбе»)

2012 жылдың мамыр айында дүниеге келген Алия – біздің тізімдегі ең жас футболшы. Соған қарамастан, 13 жастағы «Ақтөбе» шабуылшысының Лигада-ақ 5 нәтижелі әрекеті бар: 5 матчта 3 гол және 2 ассист. Жалпы алғанда, Самат алаңда 224 минут өткізді және бірде-бір ойынды толық өткізген жоқ.

Оның ең нәтижелі матчы 12-турда «Жетісуға» қарсы өтті. Үзілістен кейін алаңға шыққан Алия 2 гол соғып, тағы 2 нәтижелі пас берді. Ал соңғы турда Самат Павлодарда «Ертістің» қақпасына гол соқты, алайда «қызыл-ақтар» 2:3 есебімен жеңіліп қалды.

Аружан Сагиева («Ертіс»)

Маусымның аяқталуына төрт тур қалғанда «Ертістің» негізгі қақпашысы Стелла Бабурчина-Луклянец жарақат алып, қақпадағы орынды 13 жастағы Аружан Сагиева иеленді. Жас болғанына қарамастан, ол өзіне жүктелген міндетті лайықты атқарды: «Ертіс» төрт матч қатарынан жеңіске жетіп, Сагиева 5 гол өткізіп, 10 сейв жасады, соның ішінде «Тобылға» қарсы «құрғақ» матч өткізді.