Жаңа маусым – жаңа жұлдыздар: биыл Лига турнирлерінде кім жарқырауы мүмкін? Бірінші бөлім

Өткен маусымдағы ойынымен 2026 жылдың басты жұлдыздарының біріне айналуға әлеуеті бар жас футболшыларға назар аударуды ұсынамыз.

Даулет Орынбасар («Қайрат»)

«Сары-қаралардың» шабуылшысы жасына қарамастан, өткен маусымда-ақ флагмандық турнирде «Қайраттың» қатарынан үшінші чемпион атануына елеулі үлес қосты. Наурыз айында ғана 17 жасқа толатын Даулет 20 матчта 20 гол соғып, 5 нәтижелі пас беріп, маусымның үздік сұрмергені атанды.

Айта кету керек, бұл Орынбасардың Лигадағы екінші жарқын маусымы болды. 2024 жылы ол U-17 турнирінде жеңіске жетіп, 17 матчта 28 гол мен 14 ассист тіркеп, бірден үздік бомбардир, үздік ассистент әрі турнирдің ең құнды ойыншысы атанды.

Даулет – Лига тарихында барлық турнирлерде 100 нәтижелі әрекетке (гол + пас) алғаш жетуі мүмкін басты үміткер. Ол үшін Орынбасарға тағы 33 ұпай жинау қажет. Бұл межені ол биыл-ақ бағындыра ала ма? Жауабын күзде білетін боламыз.

Тамирлан Қалымжанов («Оқжетпес»)

«Оқжетпес» ойыншысы өткен маусымда Freedom QJ League B турнирінде көкшетаулық команданың қола жүлде алуына зор үлес қосты. Ол 18 матчта 15 гол соғып, 10 нәтижелі пас беріп, турнирдің үздік шабуылшысы атанды.

«Маусым мен үшін өте жақсы өтті, тіпті ең үздігі деуге болады. Ең есте қалған сәт – алғашқы голым. Сол сәттен бастап үлкен мотивация алдым, ол маған қатты көмектесті», – деп бөліскен еді ойыншы. Айта кетейік, ол Лигада 16 жасқа толғаннан кейінгі күні-ақ дебют жасаған.

Осы бір жыл ішінде Қалымжанов айтарлықтай тәжірибе жинады. Сондықтан алдағы маусымда ол өткен жылғы көрсеткішінен де асып түсуі әбден мүмкін.

Роман Черноморец («Қайрат»)

Черноморец жоғарыда аталған ойыншылардан ерекшелігі – ол 2010 жылдың күзінде дүниеге келген. 2024 жылы ол Freedom QJ League тарихына енді: «Қайрат» U-17 сапында 13 жас 10 ай 3 күнінде дебют жасады.

«Шахтерге» қарсы матчтың бірінші таймы сол маусымдағы жалғыз ойыны болды. Алайда бір жылдан кейін ол 2009 жылы туған жасөспірімдермен бірге қайтадан алаңға шығып, команданың негізгі ойыншыларының біріне айналды. 20 матчта 21 гол мен 6 ассист, MVP атағы және үздік бомбардир жүлдесі – бәрі өздігінен-ақ көп нәрсені аңғартады.

Биыл «сары-қаралардың» вундеркинді Лиганың флагмандық турнирінде дебют жасауы әбден мүмкін. Ол өзін қалай көрсетеді?

Батырхан Серікбай («Жас Қыран»)

Алматылық команданың қақпашысы өткен Freedom QJ League U-17 маусымындағы үздіктердің бірі болды. 19 матч, оның 9-ы «құрғақ» ойын, 14 ғана жіберілген гол және 79 сейв – өте әсерлі статистика.

Егер Батырхан флагмандық турнирде де осы қарқынын сақтай алса, ол командасына жүлде үшін күресте көмектесіп қана қоймай, маусымның үздік қақпашысы атағына да басты үміткерлердің бірі бола алады.