Жаңа маусым – жаңа жұлдыздар: биыл Лига турнирлерінде кім жарқырауы мүмкін? Екінші бөлім

Алдыңғы маусымдағы ойындарымен-ақ 2026 жылдың басты жұлдыздары атануға әлеуеті бар жас футболшыларға назар аударайық.

Абылайхан Кенжадоев («Ордабасы»)

Шымкенттік клубтың 16 жастағы шабуылшысы өткен маусымды U-17 турнирінде өткізіп, командасының күміс жүлдесіне зор үлес қосты. Ол 19 матчта 15 гол соғып, 10 нәтижелі пас берді.

Мұндай көрсеткіш Абылайханға турнирдің үздік шабуылшысы атағын алып келді. Еске сала кетейік, өткен маусымдағы барлық турнирлердің жеке номинация иегерлері Лиганың серіктесі Freedom Bank-тен 200 000 теңге көлемінде сыйақы алды.

«Келесі маусымдағы басты мақсатым – ойын деңгейін көтеріп, чемпион атану. Тұрақтылық пен шешім қабылдауды жақсартқым келеді», – деді Кенжадоев 2026 жылға қойған жоспарлары жайлы. Ол бұл маусымды Лиганың флагмандық турнирінде өткізетіні сөзсіз.

Ануар Төленді (ҚФФ Академиясы)

Төленді – өткен маусымның басты вундеркиндтерінің бірі. Ануар маусымды «Астана» U-16 құрамында бастап, 6 матчта қатарластарымен ойында 10 гол соғып, 1 ассист жасады.

Кейін ол Freedom QJ League B аясында КФФ Академиясының командасына қосылды. Мұнда қарсыластары жасы үлкен ойыншылар болды, бірақ жас шабуылшы бұл деңгейде де абдырап қалмай, 8 турда 7 гол соқты. Оның ішінде «Елімай» қақпасына салған покері де бар. Барлығы – небәрі 14 жаста! Толенди жаңа маусымда да көпшілікті таңғалдыруы әбден мүмкін.

Расул Әкімов («Шахтер»)

«Шахтер» тәрбиеленушісі өткен U-17 турнирінде командасының қола жүлде алуына үлес қосты. Ол 19 матчта 7 гол соғып, 13 нәтижелі пас берді – жартылай қорғаушы үшін өте жоғары көрсеткіш.

6 ақпанда 17 жасқа толатын Әкімов енді Лиганың флагмандық турнирінде дебют жасамақ.

«Бос уақытымда барлық матчтарымды қайта қарап, не дұрыс, не қате болғанын талдаймын. Болашақта кәсіби футболшы болып, Еуропаның үздік клубтарының бірінде ойнағым келеді», – деген еді Расул бұған дейін. Алдағы Freedom QJ League маусымы оның осы амбициялық жолындағы маңызды қадамдардың бірі болуы мүмкін.

Мирдиер Мирахматов («Ордабасы»)

Мирдиер өткен маусымдағы Freedom QJ League U-16 турнирінің үздік қақпашысы атанды. Оның командасы қола жүлдеге ие болды, ал қақпашының жеке статистикасы ерекше әсер қалдырды: 16 матчтың 8-інде қақпасын «құрғақ» сақтап, 42 сейв жасап, бар болғаны 6 гол жіберді.

«Келесі маусымдағы мақсаттарым – тұрақтылық, даму және әр турда сенімді ойын көрсету. Freedom Bank-тен алған сыйақыны білім алуға, құрал-жабдыққа, қалпына келуге жұмсаймын – кәсіби өсуге көмектесетіннің бәріне», – деді қақпашы сұхбатында.

Мирдиер алдағы маусымның өзі үшін одан да табысты болуына бар күшін салмақ.