Сюрпризсіз тур: Freedom QJ League W-тің 7-турына шолу

Көшбасшылардың ірі жеңістері

«Қайрат» пен «Астана» өз қарсыластарына еш мүмкіндік қалдырмады – сәйкесінше, «Тобылды» және «Шахтерді» ірі есеппен жеңді.

«Сары-қаралар» Қостанайда 11:1 есебімен басым түсті. Бұл жеңістің негізгі кейіпкерлері – Ангелина Остер (төрт гол, екі ассист), София Ягудина (2+1), сондай-ақ бес нәтижелі пас пен бір гол авторы Жания Махаш болды.

Сондай-ақ бір-бір голдан Ангелина Кленова, Милена Николенко, Милана Головкова және Светлана Кузиева соқты. Қостанайлықтар тарапынан жалғыз голдың авторы – Адия Тапай.

«Астана» мен «Шахтер» арасындағы ойында Достық үйінің таблосы финалдық ысқырықтан кейін 10:1 есебін көрсетті. 5-минутта Валерия Друзь өз қақпасына гол соғып алды, ал одан кейін алаң иелері басымдығын арттыра түсті. Софья Рыбак покер мен бір нәтижелі пас жасады, Асыл Пазыл – 3+1.

Сондай-ақ Зарэма Максот (1+2), Жібек Марат (екі ассист) және Альзия Жамбыл (бір гол) жақсы ойын көрсетті. 88-минутта «Золушка» командасы престиж голын соқты – Ксения Сандер көзге түсті.

«Шахтер» қатарынан үшінші рет жеңіліп отыр – Сергей Поленов командасы алтыншы орынға сырғыды.

«Ордабасы» үш ұпайды олжалады

Талдықорғанда өткен матчта алаң иелері тағы да жеңілді. «Ордабасы» футболшы қыздары «Жетісуға» жауапсыз бес гол соқты. Аруна Насирали дубль жасады, Айғаным Бекмурат, Балнұр Ергешбек пен Диана Ситникова бір-бір голдан соқты.

Қазіргі уақытта шымкенттіктер турнир кестесінде үшінші орында. Алайда бәсеке жоғары – оларды соңғы орыннан небәрі екі ұпай бөліп тұр.

«Актобе» қатарынан үшінші рет жеңді

Осы турда «қызыл-ақтар» өз алаңында «Ертісті» қабылдады. 12-минутта Елизавета Медведева павлодарлықтарды алға шығарғанымен, бұл артықшылықты ұстап тұра алмады.

Ойын тағдыры екінші таймда шешілді. 62-минутта Азиза Талап есепті теңестірді, ал он минуттан кейін Томирис Балниязова пенальти мүмкіндігін сәтті жүзеге асырды.

Осылайша, «Актобе» «Ордабасы» мен «Ертістен» бар болғаны бір ұпайға қалып келеді – және екінші айналымға жүлде үміткері ретінде қадам басады.

Лиганың спорттық-сараптамалық бөлімінің Telegram арнасына жазылыңыздар

«БАСПЕН ОЙНА» шоуының жаңа шығарылымын көріңіздер!