Маусымаралық дайджест: Freedom QJ League алғашқы маусымының түлектері кәсіби футболды қалай бағындыруда

Жуырда ғана Freedom QJ League алғашқы маусымының матчтарында жарқыраған жас таланттар үлкен футболға сенімді қадам жасауда. Олардың жетістіктері лиганың тек кәсіби спортқа жол ашып қана қоймай, ойыншыларды шынайы сынақтарға дайындайтынын дәлелдейді. Өткен маусым QJ League түлектері үшін несімен есте қалды? Жаңа маусымда олар қандай командалардан шақырту алды?

 

«Шахтер»: Жанхаев, Дильмурат, Мигунов және Холод

 

Рустам Жанхаев пен Мирас Дильмурат – еңбекқорлық пен командалық рухтың жарқын үлгілері. Өткен маусымды олар «Ұлытау» құрамында өткізіп, Бірінші Лиганың чемпиондары атанды. Әрқайсысы 24 матч өткізіп, оның 17-сін негізгі құрамда бастады. Рустам үш нәтижелі пасымен көзге түссе, Мирас команда жетістіктеріне тағы бір ассистенттік әрекет қосты.

 

Александр Мигунов «Шахтер М» құрамында 15 матч өткізіп, үш гол соқты және негізгі командада 11 матчта ойнады. Жастардың тағы бір өкілі Максим Холод қосалқы құрамда 17 матч өткізіп, екі рет қарсылас қақпасын дәл көздеді.

 

Сонымен қатар, командаға QJ League екінші маусымының түлегі Мансур Дильмурат та қосылды. Өткен маусымда ол 16 матч өткізіп, 5 гол соғып, 6 нәтижелі пас жасады. Бүгінде осы жігіттердің барлығы «Шахтердің» негізгі құрамында жаңа маусымға дайындалуда, және олардың амбициялары жанкүйерлерге шабыт сыйлайды.

 

«Қайрат»: Абдрахманов пен Байбек

 

Әбілқайыр Абдрахманов жетістікке жету жолы әрдайым тура бола бермейтінін дәлелдей түскендей. Өткен маусымда ол «Қайрат» U18 құрамына тіркелгенімен, барлық 20 матчын «Қайрат-Жастар» үшін өткізді. Оның статистикасы әсерлі: 2 гол және 8 нәтижелі пас. Қазір ол алматылық команданың негізгі құрамын бағындыруда. Жақында өткен «Қайрат» пен «Дордой» арасындағы матчта Әбілқайыр екі нәтижелі шабуылды бастап, командаға 3:1 есебімен жеңіске жетуге көмектесті.

 

QJ League бірінші маусымының үздік жартылай қорғаушысы Олжас Байбек өзінің керемет ойынымен таң қалдыруын жалғастыруда. Өткен маусымның соңында ол алматылық клубтың негізгі құрамына сенімді түрде қосылып, 3 матч өткізіп, бір гол соқты. Бұған дейін Олжас «Қайрат-Жастар» командасының негізгі ойыншыларының бірі болып, 19 матчта 7 гол соғып, тұрақты нәтижелілік көрсеткен еді.

 

Сондай-ақ, «Қайратқа» оқу-жаттығу жиындарына QJ League екінші маусымының тағы бір талантты түлегі – Данияр Ташпұлатов қосылды. Өткен жылы ол «Қайрат» U18 құрамында 19 матч өткізіп, 2 гол соғып, 9 нәтижелі пас беріп, лиганың үздік ассистенті атанды. Сонымен қатар, оның есебінде «Қайрат-Жастар» үшін өткізген 9 матч пен тағы бір нәтижелі пас бар.

 

«Атырау»: Саидалиев, Измуллаев, Мачехин және Жиеналиев

 

Юсуф Саидалиев «Атырау» қосалқы құрамының нағыз жаңалығы болды. Ол 22 матч өткізіп, 6 гол соғып, 1 нәтижелі пас берді. Бұған қоса, ол Лига Кубогында негізгі команда сапында дебют жасады.

 

Қошәлі Измуллаев та кем түспейтін маусым өткізді, қосалқы құрамның көшбасшыларының бірі ретінде танылып, 21 матчта 8 гол және 6 нәтижелі пасымен көзге түсті. Темірлан Жиеналиев одан да жоғары нәтиже көрсетіп, 21 матчта 9 гол және 3 пас жасап қана қоймай, негізгі командада дебют жасады. Андрей Мачехин де өз үлесін қосты, 18 матчта 2 гол соғып, 1 нәтижелі пас берді.

 

«Ақтөбе»: Байдәулетов пен Уманиязов

 

«Ақтөбе» сапында Аян Байдәулетов пен Мирас Уманиязов ерекше көзге түсуде. Аян қосалқы құрам үшін 24 матч өткізіп, 3 гол соқты және Лига Кубогында негізгі құрам сапында екі рет алаңға шықты. Ал Мирас өзін одан да белсенді танытып, дубль құрамында 16 матчта 2 гол соғып, негізгі команда үшін 7 матчқа қатысып, УЕФА Конференциялар Лигасында дебют жасады. Бұл ойыншылар клубтың болашағы ретінде өздерін дәлелдей бастады.

 

«Қайсар»: Мұрзагалиев

 

Темірлан Мұрзагалиев қысқа уақыт ішінде «Ақтөбе» U18 командасынан «Қайсардың» негізгі құрамына дейін өсті. Өткен маусымда ол үш команда үшін ойнады: негізгі құрамда 1 матч, дубль құрамында 22 матч және Екінші Лигадағы «Қайсар-Шиелі» үшін 2 матч. Оның нәтижелілігі – 3 гол – оның әрі қарай өсуге дайын екенін көрсетеді.

 

«Астана»: Ануаров

 

Санжар Ануаров «Астана М» командасының көшбасшыларының біріне айналып, 19 матч өткізіп, 2 гол соқты. Бұл жас ойыншы негізгі команда құрамында дебют жасап, онымен бірге Түркиядағы оқу-жаттығу жиындарына аттанды. Мүмкін, жаңа маусым оның нағыз серпінді кезеңіне айналар.

 

Бұл Freedom QJ League түлектерінің оқиғалары бізге жетістікке жету тек талантқа ғана емес, сондай-ақ қажырлы еңбекке де байланысты екенін еске салады. Бұл ойыншылар үлкен жолдан өтіп, олардың жетістіктері QJ League жаңа қатысушыларын футбол шыңдарын бағындыруға шабыттандырады.