Әр тарапқа бір жеңістен: ҚФФ Академиясы мен «Қайсардың» кейінге шегерілген матчтары қалай өтті

Еске салайық, флагмандық турнир мен Freedom QJ League U-17 аясындағы екі ойын ҚФФ Академиясы тәрбиеленушілерінің халықаралық «Даму кубогы» турниріне қатысуына байланысты кейінге шегерілген еді.

Freedom QJ League: «қасқырлардың» сенімді жеңісі

Флагмандық турнирде үш ұпай «Қайсарға» бұйырды. «Қасқырлар» сырт алаңдағы кездесуде еш қиындық көрген жоқ – қарсылас қақпасына жауапсыз үш гол соқты. Ернар Парда өз есебіне гол мен ассист жазды, сондай-ақ Мәди Жеңісұлы мен Шыңғыс Жамалбай ҚФФ Академиясының қақпасын бір-бір мәрте дәл көздеді.

Айта кетейік, матчтың соңғы үштен бір бөлігін алаң иелері кем құрамда өткізді – 65-минутта ҚФФ Академиясының қорғаушысы Никита Лисохмар перспективалы шабуылды тоқтатқаны үшін екінші сары қағаз алып, алаңнан қуылды.

Енді «Қайсар» мен ҚФФ Академиясының еншісінде алты ұпайдан бар. Олар турнир кестесінде тиісінше тоғызыншы және оныншы орындарда тұр.

Freedom QJ League U-17: автогол және алаң иелерінің минималды жеңісі

Кіші жас санатына келсек, мұнда жеңісті ҚФФ Академиясы иеленді. Алайда бұл оңай болған жоқ: матчтағы есепті 35-минутта Талғар командасының қорғаушысы Әмір Серікұлының автоголы ашты.

Дегенмен алаң иелері бұл қатені тез түзетті – 40-минутта Абзал Әділхан есепті теңестірді. Ал ҚФФ Академиясына жеңіс әкелген голды 83-минутта Жәңгір Серік соқты.

Кездесудің басты қорытындысы – турнир кестесіндегі төртінші орын мен бесінші орын арасындағы айырманың ұлғаюы. Төртінші орында 13 ұпаймен «Жас Қыран» тұр, ал бесінші сатыдағы «Қайсардың» еншісінде 7 ұпай бар. ҚФФ Академиясы енді төрт ұпай жинады – бұл команданың маусымдағы алғашқы жеңісі. Виталий Астафьев шәкірттері оныншы орында орналасып, «Тобыл» мен «Ертістің» арасында тұр. Кестені «Астана» түйіндеп тұр.

Енді футболшыларды шағын үзіліс күтіп тұр – Freedom QJ League 13 маусымда қайта оралады.