.webp)
Біз әр маусымның қорытындысы бойынша Лига табыстайтын жеке марапаттармен таныстыруды бастаймыз.
Еске сала кетейік, әрбір марапат Қазақстан футболының белгілі тұлғаларының құрметіне аталған. Маусымның үздік қақпашысына берілетін сыйлық Александр Убыкиннің есімімен аталады.
Александр Сергеевич Убыкин – кеңестік футболшы, қақпашы, қазақстандық футбол бапкері, КСРО спорт шебері.
Футболмен туған қаласы Алматыда айналыса бастады. 16 жасында жаттықтырушысы Анатолий Матвеевич Ромкомен бірге Псковқа аттанып, онда үш жыл бойы «Электрон» және «Машиностроитель» командаларында өнер көрсетті.
1972 жылы әскер қатарына шақырылды. Сол кезеңде Ленинград облысының чемпионатында ойнаған Выборгтың «Звезда» клубында өнер көрсетті. Кейін Ростовтың армиялық командасының селекционерлері оны байқап, сол клубта үш жыл ойнады.
1976 жылғы маусымда туған клубы «Қайратқа» оралды. Сол маусымда «Қайрат» қайтадан жоғары лигада өнер көрсету құқығына ие болды. 1980 жылға қарай Убыкин «Қайраттың» негізгі қақпашысына айналды. Ол «Қайрат» сапында жоғары лигада 207 және бірінші лигада 50 матч өткізді. 1988 жылғы маусымды Убыкин Павлодарда өткізіп, бірінші лигаға жолдама үшін күрескен «Трактор» сапында өнер көрсетті.
Футбол бапкері ретінде 35 жылдық еңбек өтілі бар. Әр жылдары республикалық футбол мектептері мен клубтарында жұмыс істеді, ұзақ уақыт бойы алматылық «Қайраттың» қақпашылар бапкері болды.
Александр Убыкин атындағы сыйлықтың жылдар бойынша иегерлері:
2023 жыл – Саятхан Құсайынов («Ақтөбе»);
2024 жыл – Ян Лалов («Шахтер»);
2025 жыл – Мадияр Төлеубек («Ертіс»).
