Рохус Шох Қазақстан Кубогының финалына барып келді

4 қазан күні өткен «Ордабасы» мен «Тоболдың» ойыны Қызылордадағы жаңа спорт кешені – «Қайсар Аренада» өткен алғашқы ресми матч болды.

11 мың көрерменге арналған бұл стадион дәл сол күні салтанатты түрде ашылды. Ашылу рәсіміне туризм және спорт министрі Ербол Мырзабосынов қатысты. Айта кетейік, арена УЕФА-ның 4-санатына сай келеді және халықаралық деңгейдегі ойындарды қабылдай алады.

Кездесу «Тоболдың» 2:0 пайдасына аяқталды.

Рохус Шох, QJ League президенті:

– 2022 жылдың қазан айында мен осында ПФЛК президенті ретінде келген едім. Сол кезде «Қайсар» маусымның соңында маңызды матчты «Жетісумен» ойнады. Ойын кезінде біз облыс әкімі Нұрлыбек Машбекұлы Нәлібаевпен сөйлестік.

Мен оған УЕФА талаптарына сай, 8–10 мың адамдық жаңа заманауи стадион салу керек деген ой айттым. Бұл идея оған қатты ұнады.

Матч соңында ол маған: «Халыққа жариялашы: мен саған уәде беремін, үш жыл ішінде Қызылордада жаңа футбол аренасы салынады», – деді.

Сөйтіп, мен бұл жаңалықты бүкіл стадионға жарияладым. Халық қуанып, дүр сілкінді! Әкім микрофонды алып, қазақ тілінде растады: «Иә, мен уәде беремін, үш жылдан кейін болады», – деді.

Кеше біз Нұрлыбек Машбекұлымен матчта қайта кездестік. Ол мені көре сала: «Міне, маған сол идеяны берген адам!» – деді. Ол сондай қуанышты, жүзінен нұр шашылып тұрды.

Қызылорда үшін, ойыншылар мен жанкүйерлер үшін өте қуаныштымын. Бұрын дала болған аудан небәрі бір жарым жылда өзгеріп шыға келді – стадион салынды, инфрақұрылым жасалды, барлығы таза әрі ретке келтірілген, коммуникациялар тартылған.

Федерация мұнда жастар, жасөспірімдер және ұлттық құраманың матчтарын өткізетініне сенемін. Құдай қаласа, келесі маусымда мұнда Freedom QJ League матчдейін ұйымдастыруды жоспарлап отырмыз.

«Қайсар» клубының спорт директоры Мақсат Байжанов:

– Кеше болғандай есімде, сол «Жетісумен» өткен ойын – менің қоштасу матчым еді, Рохус Рохусович те келген. Бәрі тамаша өтті, атмосфера ерекше болды. Әкім жаңа стадион саламыз деп уәде бергенде, жанкүйерлердің қуанышында шек болмады. Бұл – қызылордалық және жалпы қазақстандық футболға үлкен үлес.

Стадион салынғанға дейінгі және кейінгі тарихи суреттеріміз бар. Нұрлыбек Машбекұлына үлкен алғыс. Айтқан сөзінде тұрды – тамаша, таза футбол аренасын салып берді.

Мұнда енді тіпті Чемпиондар лигасы мен Еуропа лигасының матчтарын өткізуге болады – УЕФА стадионға 4-санат берді.

Осы стадионды күтіп, сеніп, қолдаған барша адамға алғыс! Осындай ареналар еліміздің өзге өңірлерінде де көбейеді деп үміттенемін.