Сабина Үсен – Freedom QJ League W турнирінің үздік қақпашысы!

Сабина маусымның барлық 14 турына қатысып, 75 сейв жасап, 22 гол жіберді. Оның еншісінде — бес «құрғақ» матч. Шымкенттің қыздар командасы чемпионатты турнирлік кестеде төртінші орында аяқтады.

Лиганың барлық турнирлерінде «ең пайдалы ойыншы», «үздік қақпашы», «үздік қорғаушы», «үздік жартылай қорғаушы» және «үздік шабуылшы» атанған спортшыларға Лиганың серіктесі Freedom Bank тарапынан 200 000 теңгеден сыйақы беріледі.

«Шыны керек, бұл марапатты алған сәттегі қуанышымды сөзбен жеткізу қиын. Мен үшін бұл — үлкен мотивацияның бірі болды.

Маусым ұмытылмас сезімдерге толы өтті. Келер жылға қойған мақсаттарым өте көп, соларға жету үшін жан аямай еңбектенемін.

Маусымдағы ең жарқын сәт? «Ертіске» қарсы ойындағы камбэк — біз 0:1 есебімен жеңіліп жатқанда, матч соңында теңестіріп, алға шығып, маңызды ұпай алдық.

Ал сыйақыны қалай жұмсаймын? Әзірге ойланған жоқпын.

Үлкен футболға енді қадам басқалы тұрған жас футболист қыздарды құттықтағым келеді. Келер маусым сәтті, жарқын болсын!», – деді Сабина сұхбатында.