Маусым қарқын алуда: флагмандық турнирдің 2-турына превью

«Ертіс» – «Шахтер»

Павлодарлықтар «Қайраттан» болған ірі жеңілістен кейін өз алаңында жеңіске жетуді қалайды – бірақ бұл оңай болмайды. «Кеншілер» маусымды «Таразды» жеңумен бастады, ал өткен жылы U-17 турнирінде «Ертіске» бірде-бір рет ұтылған жоқ – қонақта 1:1, Қарағандыда 3:1.

Өткен жылғы матчтың басты кейіпкері Кирилл Ермаков еді – ол хет-трик жасап, командасына жеңіс сыйлаған. Жаңа маусымның алғашқы турында ол небәрі 17 минут ойнаса да, Илья Гезикке нәтижелі пас беріп үлгерді. Алдағы ойында тағы жарқ ете ме?

«Астана» – «Қайрат»

Екі астананың жасөспірімдер дербиі екінші турда-ақ өтеді. Былтыр алматылықтар U-17 турнирінде екі ойында да жеңіске жеткенімен, Астанадағы матч өте тартысты өтті – 3:2.

Флагмандық турнирде елордалықтардың ең үздік нәтижесі – 2023 жылғы 0:0 есебі. Сол ойында «Астана» қақпашысы Әлихан Жанай «Қайраттың» жеті дәл соққысына қарамастан қақпасын «құрғақ» сақтады.

Бірінші турдан кейін «Қайраттың» бірден төрт ойыншысы – Дәулет Орынбасар, Абылай Жилқайдар, Роман Черноморец және Абылай Төлеухан – «Ордабасы» шабуылшысы Адият Отарбекпен бірге бомбардирлер көшін бастап тұр (әрқайсысы – 2 голдан). Осы турда біреу жеке дара көшбасшы бола ала ма?

«Тобыл» – «Ордабасы»

«Тобыл» маусымды Лиганың тарихи мыңыншы матчында «Қайсардан» минималды есеппен жеңіліп бастады. Ал «Ордабасы» өз алаңында «Ақтөбені» Адият Отарбектің дублі арқасында жеңді.

Бұл жолы артықшылық Қостанайда – «Тобыл Аренада» сары-жасылдар өткен маусымда жиі ұпай жинаған. Дегенмен 2009 жылғы «Ордабасы» жастары былтыр бар болғаны екі рет қана жеңілген, сондықтан «Тобылға» оңай болмайды.

«Жас Қыран» – «Тараз»

«Тараз» бірінші турда «Шахтерге» есе жіберсе, «Жас Қыран» Талғарда ҚФФ Академиясын қиындықпен жеңді. Енді алматылықтар өз алаңында ойнайды, ал Самат Наурызбаев шәкірттері қатарынан екінші рет сырт алаңда өнер көрсетеді.

Өткен жылы бұл командалар флагмандық турнирде өз алаңында бір-бірінен басым түсті. Ал U-17-де екі матч та «Жас Қыранның» пайдасына шешілген. Оңтүстіктің кезекті тартысты текетіресі күтіп тұр.

«Ақтөбе» – «Каспий»

Екі команда да бірінші турда 1:2 есебімен жеңілді. Демек, бұл жолы кем дегенде біреуі алғашқы ұпайларын алады.

2009 жылғы «Каспий» жастары былтыр U-17-де соңғы орындардың бірін иеленсе, «Ақтөбе» бесінші болды. Бірақ өзара ойындарда «қызыл-ақтарға» жеңіс оңай келген жоқ – 1:0 және 2:1. Бұл жолы не болады?

ҚФФ Академиясы – «Қайсар»

Бұл матч ҚФФ Академиясы тәрбиеленушілерінің Шымкентте өтетін «Даму кубогына» қатысуына байланысты 30 мамырға ауыстырылды.

Fantasy QJ League: ережелер мен жүлделер