QJ League-ның екінші маусымының символикалық құрамасы: әр ойыншы туралы толық мәлімет

1 желтоқсан күні Almaty Theatre сахнасында өткен жабылу рәсімінде турнирдің символикалық құрамасы жарияланды.

 

Бұл құрамға мына ойыншылар кірді: қақпашы Ян Лалов («Шахтер»), қорғаушылар Иван Пивоваров («Тобыл»), Данияр Ташпулатов («Қайрат»), Амирбек Базарбаев («Қайрат») және Азизжон Бердиев («Тараз»), жартылай қорғаушылар Роман Асылбаев («Шахтер»), Алан Азамат («Астана») және Азамат Тұяқбаев («Қайрат»), сондай-ақ шабуылшылар Нұрдаулет Орынбасар («Тараз»), Бақдәулет Нұралы («Ордабасы») және Дастан Сатпаев («Қайрат»).

 

«Шахтер» командасының қақпашысы Ян Лалов турнирде ең көп «құрғақ» ойын өткізген рекордшы атанды: 22 ойынның 8-інде қақпасын таза сақтады. Ол қарсыластардың 99 соққысының 74-ін қайтарды. Осындай жарқын ойыны оған символикалық құрамға енуімен қатар, маусымның үздік қақпашысы ретінде Александр Убыкин атындағы жүлдені әкелді.

 

«Тобыл» командасының қорғаушысы Иван Пивоваров 21 ойында 163 рет қарсыластың шабуылын тоқтатып, турнирдің үздік перехватшысы атанды. Бұдан бөлек, ол 276 рет қарсыласынан допты тартып алып, тура пас беру саны бойынша (779 пас) екінші орынға тұрақтады.

 

«Қайраттың» қорғаушысы Данияр Ташпулатов 19 ойында 9 нәтижелі пас беріп, турнирдің үздік ассистенті атанды. Сонымен қатар, ол 2 гол соғып, «гол+пас» көрсеткіші бойынша үздік қорғаушылардың бірі болды. Бұл көрсеткіште ол тек «Астана» ойыншысы Абзал Сағынға жол берді (12 ұпай қарсы 11 ұпай).

 

«Қайрат» қорғаушысы Амирбек Базарбаев турнирдің үздік қорғаушысына берілетін Евгений Яровенко атындағы жүлдені жеңіп алды. 17 ойынның ішінде ол 799 пастың 643-ін дәл жеткізіп (80%), 204 рет допты тартып алды, 50 перехват жасады, 4 гол соғып, 1 нәтижелі пас берді.

 

«Тараз» командасының қорғаушысы Азизжон Бердиев 20 ойында 2 гол соғып, 3 нәтижелі пас берді. Сонымен қатар, ол 97 рет перехват жасап, 202 рет допты тартып алып, 960 пастың 760-ын дәл орындады.

 

«Шахтер» жартылай қорғаушысы Роман Асылбаев маусым қорытындысы бойынша Антон Шох атындағы үздік жартылай қорғаушы жүлдесін жеңіп алды. Ол 20 ойында 10 гол соғып, 8 нәтижелі пас берді. Сонымен қатар, ол 662 жекпе-жектің 283-ін жеңіп шыққан.

 

«Астана» ойыншысы Алан Азамат 22 ойында 6 гол соғып, 4 нәтижелі пас берді. Ол жекпе-жектерде 239 жеңіс (535-тің ішінен) көрсеткен.

 

«Қайрат» ойыншысы Азамат Тұяқбаев турнирдің үздік бомбардирлерінің үштігіне кірді. Ол 18 ойында 18 гол соғып, 8 нәтижелі пас беріп, «гол+пас» көрсеткіші бойынша да алғашқы үштікке енді.

 

«Тараз» шабуылшысы Нұрдаулет Орынбасар Эдуард Сон атындағы үздік шабуылшы жүлдесін алды. Ол 17 ойында 15 гол соғып, 4 нәтижелі пас берді. Оның тек 29 соққысы қақпаға дөп тигенін ескерсек, әрбір екінші соққысы голға айналды.

 

«Ордабасы» шабуылшысы Бақдәулет Нұралы турнирдің үздік бомбардирі атанып, Евстафий Пехлеваниди атындағы жүлдені жеңіп алды. Ол 22 ойында 22 гол соғып, 6 нәтижелі пас беріп, «гол+пас» көрсеткіші бойынша көш бастады.

 

«Қайрат» шабуылшысы Дастан Сатпаев турнирдің ең пайдалы ойыншысы ретінде Бахтиёр Зайнутдинов атындағы жүлдені иеленді. Ол 12 ойында 19 гол соғып, 7 нәтижелі пас берді. Осының арқасында еуропалық клубтардың назарын аударғаны туралы ақпарат пайда болды.

 

 

QJ League-ның символикалық құрамасына енген әр ойыншы өз маусымында ерекше көзге түсіп, бұл құрметке лайық болды.

 

Алда жаңа маусым – демек, Лигада жаңа жұлдыздар пайда болмақ?