Темірлан Әбжапар – Freedom QJ League U16 Ең пайдалы ойыншысы!

Әбжапар маусымда 19 матч өткізіп, 3 гол соқты және 17 нәтижелі пас берді. Осы көрсеткіштің арқасында ол турнирдің үздік ассистенті атанды. Мысалы, екінші орында тұрған Мади Құдайбергенде бар болғаны жеті ассист бар. Темірлан 579 пас­тың 345-ін дәл жеткізген – дәлдік көрсеткіші 60%.

Freedom Bank серіктестігі аясында Лиганың барлық турнирлерінде «ең пайдалы ойыншы», «үздік қақпашы», «үздік қорғаушы», «үздік жартылай қорғаушы» және «үздік шабуылшы» атанған футболшылар 200 000 теңгеден алады.

«Эмоцияларым өте жақсы. Номинацияда жеңіске жеткеніме қуаныштымын. Командама және бапкерлеріме алғыс айтқым келеді – олардың қолдауы болмаса, бұл нәтиже болмас еді. Маусым да өте сәтті өтті: Лига чемпионы атандық және MVP номинациясын иелендім.

Келесі маусымға қойылған мақсаттар – өте жоғары. Соларды орындау үшін барымды саламын. Биыл біз алғаш рет осыншама көп камера мен көрермен алдында ойнадық. Басында аздап қобалжу болды, бірақ уақыт өте келе үйреніп кетесің.

Маусымдағы ең есте қалған сәт – чемпион атанып, кубокты басымыздың үстіне көтерген кез. Жүлде қаражатына келесі маусымға жаңа бутсы алуды жоспарлап отырмын – одан да көп трофей жеңуге көмектессін.

Келесі маусымдағы дебютанттарға сәттілік және сенімділік тілеймін. Жауапкершіліктен қорықпай, тәуекел етуге дайын болсын», – деді ол сұхбатында.