Темірлан Ермек – Freedom QJ League B маусымының ең пайдалы ойыншысы!

Темірлан маусымды өте әсерлі статистикамен аяқтады: 16 ойын – 16 гол және 9 голдық пас. Сондай-ақ ол қарсылас қақпасына 83 соққы жасады, оның 38-і дәл қақпаға бағытталды. Маусым бойы Темірлан 318 пас беріп, оның 218-і (69%) дәл жетті.

Лиганың барлық турнирлерінде «ең пайдалы ойыншы», «үздік қақпашы», «үздік қорғаушы», «үздік жартылай қорғаушы» және «үздік шабуылшы» атанған ойыншыларға серіктес Freedom Bank тарапынан 200 000 теңгеден табысталады.

«Эмоцияларым шексіз. MVP атағын алу – үлкен мәртебе. Командама, бапкерлерге және маусым бойы қолдаған барлық жанкүйерлерге алғыс айтамын. Бұл мен үшін алға ұмтылуға үлкен мотивация.

Маусым өте эмоционалды әрі табысты өтті. Келесі маусымдағы мақсат – негізгі құрамда орнығу.

Ең есте қалған сәт – Талғардағы ҚФФ Академиясына қарсы маңызды матч. 63-минутқа дейін 0:2 есеппен жеңіліп жатқанда, ойынды өзгерту керек болды. Мен ойынды өз мойныма алдым: алдымен Әлихан Әлидің пасынан гол соқтым, ал он минуттан кейін оған өзім пас шығарып бердім. Ойын 2:2 аяқталды, ал бір аптадан кейін Шымкенттегі кездесуімізде оларды 4:0 есебімен сенімді жеңдік.

Жеңіп алған сыйақыны келесі маусымға дайындыққа, өзімді дамытуға және жыл бойы қолдаған туған-туыстарыма сыйлық алуға жұмсауды жоспарлап отырмын.

Жас ойыншыларға айтар тілегім – сәттілік, батылдық, төзім және өз күшіне сенім. Қателіктен қорықпаңыздар – олар өсуге көмектеседі. Еңбек етіңіздер, ойынды сүйіңіздер және өздеріңізге сеніңіздер – сонда нәтиже міндетті түрде болады», – деді Темірлан.