Міне, бәрі аяқталды! Freedom QJ League соңғы турының қорытындысы

«Астана» – күміс жүлдегер!

Турдың орталық ойынында елордалық команда өз алаңында «Жас Қыранды» 2:1 есебімен жеңді. Голдарды Ален Пак пен Максат Абраев соқты, ал қарсыластар сапынан тек Бекжан Хафизов бір рет көзге түсті. Алматылықтар екінші таймды бір ойыншымен өткізді – Ерасыл Сансызбай бірінші таймда екі ескерту алып, алаңнан қуылды.

Маусымның көп бөлігінде «Жас Қыран» күміске басты үміткер саналып келді – алғашқы айналымды бірде-бір жеңіліссіз өткерді. Алайда екінші жартысы сәтсіз шықты, нәтижесінде команда жүлдесіз қалды, ал қола медаль «Шахтерге» бұйырды.

«Шахтер» көптен күткен медальға қол жеткізді

Карағандылықтар екі маусым қатарынан үздік үштікке сәл жетпей қалған еді. Биыл олар өз мақсатына жетті, бірақ бұл оңай болған жоқ.

Соңғы турда «Шахтер» өз алаңында «Ордабасыны» қабылдады. Бірінші таймда есеп ашылмады, ал екінші таймның 60-минутында шымкенттіктер сапынан Абдурахман Орумбаев гол соқты.

Бәрі аяқталды деп ойланған сәтте, 86-минутта Мирас Куат Нұрхан Қағазбаевтың пасынан кейін таразы басын теңестірді. Қорытынды есеп – 1:1, және осы нәтижемен «Шахтер» маусымды 40 ұпаймен үшінші орында аяқтады, «Жас Қыраннан» өзара кездесулер есебі бойынша озып кетті. «Ордабасы» алтыншы орынға түсті, ал бесінші орынды «Ертіс» иеленді.

Айта кетейік, Глеб Макридов сары қағаздардың көптігіне байланысты бұл матчқа қатыса алмады. Дегенмен, үш жыл қатарынан Freedom QJ League-де ойнаған команданың маңызды ойыншысы маусымды медальмен аяқтады. Ал «гол+пас» көрсеткіші бойынша лиганың рекордшысы болса да, ең үздік сұрмерген атағы басқа ойыншыға бұйырды.

Орынбасар – маусымның үздік бомбардирі!

«Қайрат» өз алаңында «Таразды» сенімді түрде жеңіп, маусымды жеңіліссіз чемпион ретінде аяқтады. Гол авторлары – Даулет Орынбасар, Абылай Төлеухан және Аламгир Смаков. Қонақтар сапынан Жансерік Жетен бір гол соқты. Азизжон Бердиев те пенальтиден көзге түсуге мүмкіндігі болған, бірақ оның соққысын қақпашы Бахтияр Алдашев қайтарып үлгерді.

Даулет Орынбасар 20-шы голын соғып, сұрмергендер жарысында жеке көшбасшы атанды және Евстафий Пехлеваниди сыйлығын иеленді.

Жеке марапаттар рәсімі – QJL Awards – 1 қараша күні Астанада өтеді, ал тікелей эфир Freedom Media арнасында көрсетіледі.

2008 жылғы «Қайрат» буыны Freedom QJ League-де жеңіліс дәмін татпай келе жатыр – олардың жеңіліссіз сериясы 44 матчқа жетті.

«Ертіс» – бесінші орында

Павлодарлықтар «Атырауды» 2:1 есебімен жеңді. 17-минутта Алимжан Абдыкалық есеп ашты, 35-минутта Максат Мұратов пенальтиден таразы басын теңестірді, ал 69-минутта Ансар Сапарғазинов жеңіс голын соқты. Осылайша «Ертіс» бесінші орынға көтерілді – «Ордабасыны» өзара кездесулер нәтижесі бойынша артта қалдырды.

«Тобыл» маусымды жеңіспен аяқтады

Қостанайлықтар жеті матчтық жеңіліс сериясын тоқтатып, соңғы турда «Қайсарды» 2:1 есебімен ұтты. Голдарды Александр Козицкий мен Нұрмұбарак Жақсылық соқты, ал қарсы жақтан Ерасыл Асанхан бір голмен жауап берді. Осылайша «Қайсар» соңғы, 11-орында қалды, ал «Тобыл» 10-орында маусымды жапты.

Матчтың соңында Куаныш Күзембаев екінші ескерту алып, командасын азшылықта қалдырды.

«Каспий» – жарқын нүктемен!

Маусым бойы турнирдің аутсайдерлерінің бірі саналған ақтаулық команда соңғы турда «Ақтөбені» ірі есеппен жеңіп, тоғызыншы орынға орнықты.

Гол соққандар – Алихан Жұмабай, Шахмардан Демесин (пенальти), Дидар Ызтурған және Аманияз Орынғалиев. Қонақтар сапынан Ислам Нурадинов бір голмен көзге түсті.

Айта кетсек, «Ақтөбе» соңғы турға дейін сегізінші орнын сақтап қалуға кепілдік алған еді – олардың жетінші орын алған «Тараздан» артта қалуы 10 ұпайды құрады.