«Астана» үшін басты сынақ: Freedom QJ League W 10-туры алдындағы жағдай

«Қайрат» – «Астана»

Бұл тек турдың ғана емес, бүкіл маусымның басты матчы болуы мүмкін: көшбасшы ең жақын қуғындаушысы әрі қазіргі чемпионның алаңына қонаққа барады. Екі команда арасын небәрі бір ұпай бөліп тұр.

«Астана» бұл кездесуге әлі жеңілмеген жалғыз команда ретінде келеді – сегіз жеңіс, бір тең ойын және 29:6 доп айырмасы. Елордалық футболшы қыздар әсіресе сырт алаңда сенімді ойнап жүр: төрт матч, төрт жеңіс, 13 гол және небәрі бір жіберілген доп.

Ал «Қайрат» шабуылдағы қуатымен таңғалдырып келеді – тоғыз турда 55 гол. Алайда алматылықтарға маусымдағы алғашқы әрі әзірге жалғыз жеңілісті дәл «Астана» сыйлағанын ұмытпаған жөн – елордадағы кездесу 2:0 есебімен аяқталды.

Бұл матчтың маңызы айқын. Жеңіс «Қайратты» бірінші орынға шығарады (27 ұпайға қарсы 25), тең ойын «Астананың» минималды басымдығын сақтайды, ал қонақтардың жеңісі айырманы төрт ұпайға дейін ұлғайтады – оның үстіне, маусымның аяқталуына небәрі төрт тур қалады.

«Шахтер» – «Ордабасы»

Турнирдің бесінші және алтыншы командаларының кездесуі – алайда бұл орындар матчтың маңызын толық көрсете алмайды. 11 ұпайы бар «Шахтер» үшінші орыннан тек қосымша көрсеткіштер бойынша қалып тұр, ал «Ордабасы» (10 ұпай) да олардан бір қадам жерде. Қарағандыдағы матч қола жүлде үшін күресте маңызды рөл атқарады.

Бірінші айналымда командалар Шымкентте нәтижелі тең ойын көрсетті – 3:3. Бұл «Ордабасының» осы маусымдағы өнеріне сай келеді: тоғыз турдағы төрт тең ойын – турнирдегі ең жоғары көрсеткіш. Сонымен қатар оңтүстік команда «Астанадан» ұпай алған жалғыз ұжым болып отыр (елордада 2:2).

Айта кетерлігі, «Шахтер» маусымда 28 гол жібергенімен, оның 11-і «Қайратқа» қарсы үй матчына тиесілі. Қарағандыда өткен қалған үш ойында алаң иелері небәрі бір гол жіберді – «Қайсардан».

«Ертіс» – «Тобыл»

11 ұпайы бар «Тобыл» төртінші орында, ал «Ертіс» (7 ұпай) – жетінші сатыда.

Басты интрига – қостанайлық футболшы қыздар сырт алаңда ақыры үш ұпай ала ма? Әзірге олардың қонақтағы статистикасы таңғалдырады: төрт матч, екі тең ойын, екі жеңіліс және небәрі үш гол. Ал өз алаңында команда бес кездесудің үшеуінде жеңіске жетіп, 12 гол соққан.

Дегенмен «Ертістің» де жақсартатын тұстары бар: тоғыз турда небәрі тоғыз гол.

Қостанайдағы алғашқы кездесу «Тобылдың» 3:2 есебімен жеңісімен аяқталған. Қарымта матчта не күтеміз?

«Қайсар» – «Ақтөбе»

Үш ұпайы бар «Қайсар» турнир кестесін түйіндеп тұр: бір жеңіс, сегіз жеңіліс және 6:39 доп айырмасы. Жалғыз жеңіс – екінші турда өз алаңындағы «Ордабасыға» қарсы 3:2. Одан кейін команда қатарынан жеті рет жеңілді. Қызылордалықтардың шабуылының негізгі күші – Шамсия Зарлыхан: команданың алты голының бесеуін соққан.

«Ақтөбе» үшінші орында келе жатқанымен, матчқа сәтсіз сериямен келеді – соңғы екі турда екі жеңіліс. Сырт алаңдағы статистика да алаңдатады: төрт кездесуде «қызыл-ақтар» төрт ұпай жинап, төрт гол соққан.

Бірінші айналымда дәл «Қайсар» «Ақтөбенің» осы маусымдағы ең ірі жеңісінің құрбаны болды (5:0). Бұл жолы қызылордалықтар қорғанысын реттеп, шабуылын жандандыра ала ма?