Чемпиондар лигасы, Еуропа лигасы және УЕФА Жасөспірімдер лигасы: қазақстандық жас футболшылардың халықаралық тәжірибесі

«Қайрат»

Словениялық «Олимпиясын», Финляндиялық КуПС клубын, Словакиялық «Слованын» және Шотландиялық «Селтигін» жеңу арқылы алматылықтар клуб тарихында алғаш рет Еуропаның басты клубтық турнирінің іріктеу кезеңінен өтті. Негізгі кезеңде «Қайраттың» қарсыластары Лиссабондық «Спортинг», мадридтік «Реал», кипрлік «Пафос», миландық «Интер», даниялық «Копенгаген», грек «Олимпиакосы», бельгиялық «Брюгге» және лондондық «Арсенал» болды.

Рафаэль Уразбахтин шәкірттері бұл кезеңде небәрі бір ұпай жинағанымен (Орталық стадионда «Пафоспен» тең ойнады), «сары-қаралар» сапалы әрі мінез көрсеткен ойын өрнегін паш етті. Айта кетерлігі, «Қайрат» негізгі кезеңдегі барлық төрт сырт алаңдағы матчта да гол соқты, ал «Копенгаген» мен «Арсеналдың» қақпасына екі реттен дәл соққы жасалды.

Маусым қорытындысы бойынша Чемпиондар лигасында Freedom QJ League-да ойнаған жеті футболшы дебют жасады. Олар — Дастан Сатпаев, Рамазан Бағдат, Олжас Байбек, Шерхан Қалмұрза, Азамат Тұяқбаев, Мұхамедәли Әбіш және Мансур Бірқұрманов.

Тамыз айында 17 жасқа толған Сатпаев алматылық команданың басты жұлдыздарының біріне айналды. Болашақта «Челси» сапында ойнайтын, Freedom QJ League 2024 MVP атанған ойыншы еурокубок маусымында 12 матч өткізіп, 4 гол соғып, 1 нәтижелі пас берді. Сонымен қатар Олжас Байбек пен Азамат Тұяқбаев бір-бір голдан соқты, ал қақпашы Шерхан Қалмұрза «Спортинг» пен «Реалға» қарсы матчтарда Александр Заруцкий мен Темірлан Анарбековтің орнын лайықты түрде басты.

«Ақтөбе»

«Ақ-қызылдар» Еуропа лигасының бірінші іріктеу кезеңінде Варшавалық «Легиясымен» екі матч өткізіп, екі ойында да 0:1 есебімен жеңілді. Бұл кездесулерге 19 жастағы жартылай қорғаушы Аян Байдавлетов қатысып, жалпы 26 минут алаңда болды.

Кейін «Ақтөбе» Конференциялар лигасының екінші іріктеу кезеңінде чехиялық «Спартадан» ұтылып (үйде 2:1, сырт алаңда 0:4), еурокубоктағы өнерін аяқтады. Бұл матчтарда Байдавлетов алаңға шыққан жоқ.

«Қайрат» U-19

«Қайраттың» Чемпиондар лигасының негізгі кезеңіне шығуы алматылықтарға УЕФА Жасөспірімдер лигасының сәйкес жолында ойнауға мүмкіндік берді. Бұл турнирде 19 жасқа дейінгі футболшылар негізгі команданың қарсыластарының академия өкілдерімен алғашқы алты турда кездеседі. «Қайрат» жастары «Спортинг», «Реал», «Пафос», «Интер», «Копенгаген» және «Олимпиакоспен» ойнады.

Алматылық жасөспірімдер дат командасымен тең түсіп, маусымды Грекия өкілдерін жеңумен аяқтады, сол арқылы оларды плей-оффтан тыс қалдырды. Жора Арутюнян шәкірттері 4 ұпай жинап (дәл осындай көрсеткіш «Баварияда» да болды), 36 команданың ішінде 28-орынға тұрақтады. Қазақстандықтар турнир кестесінде «Арсенал», «Галатасарай» және «Аталанта» академияларын артта қалдырды.

Бұл команданың барлық ойыншылары Freedom QJ League тәжірибесіне ие. Олардың қатарында гол авторлары Исмаил Бекболат («Реалға»), Абылай Төлеухан («Пафосқа»), сондай-ақ бұған дейін аталған Тұяқбаев («Спортингке» қарсы дубль), Бағдат («Олимпиакос» пен «Копенгагенге»), Бірқұрманов («Копенгагенге») және Әбіш («Олимпиакосқа») бар. Үш матчта команда қақпасын Шерхан Қалмұрза қорғады.

«Ордабасы» U-19

Freedom QJ League 2024 жеңімпазы «Қайраттың» Чемпиондар лигасы жолына түсуі Қазақстанға УЕФА Жасөспірімдер лигасына тағы бір команда ұсынуға мүмкіндік берді. Ұлттық чемпиондар жолындағы квота маусымның вице-чемпионы — шымкенттік «Ордабасыға» берілді. Бұл команда да Freedom QJ League-да ойнаған футболшылардан жасақталды.

Алғашқы раундта «Ордабасы» Минскінің «Динамосымен» кездесіп, екі матчтың қорытындысы бойынша (3:1) беларусьтік клуб келесі кезеңге өтті. Шымкенттіктер сапындағы жалғыз голды Максим Гамаюнов соқты.

Айта кету керек, Freedom QJ League «Ордабасыға» УЕФА Жасөспірімдер лигасының ұлттық чемпиондар жолындағы қазақстандық қатысушыны қолдау бағдарламасы аясында қаржылай көмек көрсетті. Лига клубқа турнирге қатысуға байланысты нақты келісілген мақсаттарға жұмсауға арналған 12,5 миллион теңге бөлді және жергілікті жанкүйерлер үшін дәстүрлі Matchday форматында футбол мерекесін ұйымдастыруға атсалысты.


Осылайша, еурокубоктық маусымға Freedom QJ League-да өнер көрсеткен ондаған қазақстандық жас футболшы қатысты. Олардың кейбірі бұл жолда шешуші рөл атқарды. Алда — жаңа маусым, жаңа мүмкіндіктер және халықаралық аренадағы жаңа сынақтар.